لە کەرکووک خوێندنی کوردی دەستپێدەکات

ئاڤا نیوز

 

ئەمڕۆ پرۆسەی خوێندنی کوردی لە کەرکووک دەستیپێکرد و یەکەم زەنگی ساڵی نوێی خوێندن لێدرا و بەڕێوەبەری خوێندنی کوردیش لە شارەکە هاوکارییەکانی حکومەتی هەرێمی کوردستان بەرز دەنرخێنێت.

 

وێنە گەورەکە: زیاتر لە 20 قوتابخانەی زمانی کوردی سێ دەوامی تێدا هەیە و ئەمەش دەرخەری کەمی قوتابخانەیە و مامۆستا کامەران عەلی حەسەن هۆکارەکەی بۆ ڕووداوەکانی دوای 16ـی ئۆکتۆبەر دەگەڕێنێتەوە.

 

لێدوانی فەرمی: کامەران عەلی حەسەن، بەڕێوەبەری خوێندنی کوردی لە کەرکووک بە ئاڤا نیوزی ڕاگەیاند، پێش دەستپێکردنی وەرزی نوێی خوێندن سەرۆکی حکومەتی هەرێمی کوردستان نزیکەی هەزار و 100 مامۆستای لە سنووری شارەکە کردە گرێبەست و نزیکەی یەک ملیۆن پەرتووکیشیان بۆ دابینکردووە.

 

ژمارەکان وادەڵێن: بۆ ساڵی نوێی خوێندنی کوردی لە کەرکووک نزیکەی 100 هەزار قوتابی هەن، نزیکەی 400 قوتابی لە خوێندنی عەرەبییەوە هاتوونەتەوە کوردی و بەراورد بە ساڵی ڕابردوو ڕێژەکە زیاتر بووە.

 

ئەوەی پێویستە بیزانیت: ساڵی ڕابردوو قوتابی یەکەمی سەر ئاستی عێراق لە خوێندنی کوردی بوو لە شاری کەرکووک و بەڕێوەبەری خوێندنی کوردی پاڵپشتی حکومەتی هەرێمی کوردستان بە یەکێک لە هۆکارە سەرەکییەکانی ئەم سەرکەوتنە دەزانێت.