دوو لیوای هاوبەشی پێشمەرگە لە سنووری هەرێمی کوردستان دەستبەکار دەبن

ئاڤا نیوز 

 

دوو لیوای هاوبەشی پێشمەرگە ڕاهێنانیان پێکراوە و  ئێستا دەست بە ئامادەکاری بۆ دروستکردنی خاڵی جێگیرکردنی لیواکان دەکرێت.

 

وێنە گەورەکە: لە ساڵی 2021 عێراق و هەرێمی کوردستان بڕیاری دامەزراندنی دوو لیوای هاوبەشیان بە هاوکاری هێزەکانی هاوپەیمانان دا، تاوەکو لەو شوێنانەی بۆشایی ئەمنیان هەیە جێگیر بکرێن.

 

لێدوانی فەرمی: سیروان بارزانی، فەرماندەی میحوەری شەشی پێشمەرگە، بە ئاڤا نیوزی گوت: ئێستا کەرەستە بۆ دروستکردنی خاڵ بۆ لیوا هاوبەشەکان دەهێنرێت، پێشبینی دەکەم تا دوو مانگی دیکە کارەکانیان تەواو بکرێت و لیواکان دەست بە دەوام بکەن، و نزیکەی 15 خاڵ لەو بۆشاییە ئەمنییانە دروست دەکرێن.

 

لەلایەکی دیکەوە: سیروان بارزانی ڕایگەیاند ''سنووری میحوەری شەش تەنیا دوو خاڵی تێدا دروست دەکرێت، کە 90% بۆشایە ئەمنییەکە پڕ دەکاتەوە، بەڵام ڕووی قەرەچوغ بۆشایی ئەمنی وەک خۆی دەمێنێت، دەبێت چاوەڕوانی دامەزراندنی لیوای دیکە بکەین".

 

ئەوەی پێویستە بیزانیت: دوو لیوای هاوبەش ڕاهێنانەکانیان تەواو بووە و لیوایەکی دیکەش لە ڕاهێناندان، دوای دروستکردنی خاڵەکان لەو شوێنانە جێگیر دەکرێن.

 

ئەوەش بزانە: خاڵی سەربازی بریتییە لە دانانی چەند پێشمەرگەیەک لە نێوان هەر 100 بۆ 200 مەتر بەمەبەستی پاراستی ئەمنییەتی ناوچەکە.