سوودانی لە نەتەوەیەکگرتووەکان: ڕێگەنادەین لە عێراقەوە هێرش بکرێتە سەر هیچ وڵاتێک

ئاڤا نیوز

 

سەرۆکوەزیرانی عێراق لە نەتەوەیەکگرتووەکان وتارێکی پێشکەش کرد و ڕەتیکردەوە ڕێگە بە هیچ گرووپ و لایەنێک بدرێت لە عێراقەوە هێرش بکاتە سەر وڵاتان، داواشی لە هەموو وڵاتانی جیهان کرد پێکەوە کار بۆ پاراستنی ئاسایشی ناوچەکە و جیهان بکەن.

 

وێنە گەورەکە: ساڵانە کۆبوونەوەی کۆمەڵەی گشتیی نەتەوەیەکگرتووەکان لە نیویۆرکی ئەمریکا  دەکرێت، ڕۆژی 21-09-2024، سەرۆکوەزیرانی عێراق بۆ بەشداریکردن لە کۆبوونەوەکانی خولی 79ـیەمینی کۆمەڵەکە گەیشتە نیویۆرک.

 

لێدوانی فەرمی: محەممەد شیاع سوودانی، سەرۆکوەزیرانی عێراق لەمیانی کۆبوونەوەکەدا گوتارێکی پێشکەشکرد و ڕایگەیاند، حکومەتەکەی کاردەکات بۆ ئەنجامدانی چاکسازیی زیاتر لە بواری ئابووری و باشترکردنی دۆخی ئەو چین و توێژانەی زیاتر پێویستییان بە چاودێری و هاوکاریی دەوڵەت هەیە.

 

سوودانی جەختی کردەوە، لەسەر بنەمای ڕێزگرتن و بەرژەوەندیی هاوبەش پەیوەندییە نێودەوڵەتییەکانی عێراق و وڵاتانی جیهان بەهێز دەکەن، پابەندیشن بەوەی ڕێگە نادەن لە خاکی عێراقەوە هێرش بکرێتە سەر وڵاتانی دیکە

 

لەلایەکی دیکەوە: سوودانی بە ئاماژەکردن بەوەی پابەندن بە هێنانەدی حکومڕانی چاک لە کەرتی گشتی و ڕووبەڕووبوونەوەی گەندەڵی، جەختی لابردنی ئاستەنگەکانی بەردەم کەرتی تایبەت و خێراترکردنی بەئەلیکترۆنیکردنی کاروبارەکان و کاراکردنی ئەو یاسایەنەی سەرپێچیکاران سزادەدەن کردەوە.

 

گۆشەیەکی دیکە: لە گوتارەکەیدا سەرۆکوەزیرانی عێراق ئاماژەی بە گرژییەکانی ڕۆژهەڵاتی ناوەڕاست کرد، بەتایبەت شەڕی غەززە و هێرشەکانی ئیسرائیل و حیزبوڵڵای لوبنان بۆ سەر یەکتر کە ماوەیەکە چڕتر بوونەتەوە، بەپێویستی زانی "دەستدرێژییەکانی سەر غەززە و لوبنان کۆتاییان پێبێت و هەمووان کار بۆ پاراستنی ئاسایشی جیهان و ناوچەکە بکەن".