لە چوار ساڵدا 957 کرێکار خانەنشین کراون

 

ئاڤا نیوز

 

 بە گوێرەی ئامارێکی وەزارەتی کار و کاروباری کۆمەڵایەتیی حکومەتی هەرێمی کوردستان، لە چوار ساڵی ڕابردوو، له‌ هه‌رێمى كوردستان 957 كرێكار خانه‌نشين كراون.

وێنە گەورەکە: تەنیا له‌ كابينه‌ى نۆيه‌می حکومەتی هەرێمی کوردستان، 182 هه‌زار کرێکاری ناوخۆیی و بیانی دەستەبەر کراون و هەزار و 816 پڕۆژەش بەهۆی پابەندنەبوون بە دەستەبەرەوە، سزا دراون.

لێدوانی فەرمی: دڵشاد مەحموود، بەڕێوەبەری گشتی لە وەزارەتی کار و کاروباری کۆمەڵایەتی، بە ئاڤا نیوزی ڕاگەیاند: مافى كرێكاران له‌ هه‌رێمى كوردستان، له‌ ڕێگەى ياساوه‌ دەپارێزرێت‌، به‌ پێى ياساى خانه‌نشينیی و ده‌سته‌به‌رى كۆمه‌ڵايه‌تى، خانەنشینیی پیاوان، 20 ساڵ خزمەت و 60 ساڵ تەمەنە، بۆ ئافرەتانیش 20 ساڵ خزمەت و 55 ساڵ تەمەن دیاری کراوە.

ئەوەی پێویستە بیزانیت: بەپێی یاسا، ده‌بێت 75%ـى كرێكارانى هه‌ر پڕۆژه‌يه‌ك كورد بن و ته‌نیا 25%ـی کرێکاری بيانى بن، ئه‌و كرێكارانه‌ى له‌سه‌ر كارن ده‌سته‌به‌ر ده‌كرێن، به‌ جۆرێك 5%ـى مووچەی کرێکار و 12%ـى داهاتی خاوەن پڕۆژە دەخرێتە سەر سندووقی خانەنەشینیی، کۆی گشتی دەکاتە 17%  و دوای ئەوەی کرێکار گەیشتە ته‌مه‌نى خانەنشینبوون، خانەنشینییەکەی دەدرێتێ.