بەهەمیشەییکردنی فەرمانبەرانی گرێبەست لەنێوان هەولێر و بەغدا تاوتوێ دەکرێت

ئاڤا نیوز

 

حکومەتی هەرێمی کوردستان لە هەوڵی بەردەوام دایە، بۆ ئەوەی فەرمانبەرانی گرێبەست بکرێنە هەمیشەیی، بۆ ئەم مەبەستەش پێویستی بە هەماهەنگی بەغدایە.

 

وێنە گەورەکە: 30 هەزار فەرمانبەری گرێبەست لە هەرێمی کوردستان هەن، 34 ملیار و 600 ملیۆن دینار تێچووی مووچەی مانگانەیانە، پڕۆسەی بەهەمیشەییکردنیان پێنج بۆ 10 ملیار دیناری پێویستە.

 

لێدوانی فەرمی: هونەر جەمال، گوتەبێژی وەزارەتی دارایی و ئابووری حکومەتی هەرێمی کوردستان لە میانی بەشداریکردنی لە گەشتی هەواڵەکانی کاتژمێر 07:00ـی ئاڤا میدیا کە هەوراز گوڵپی پێشکەشی دەکات، ڕایگەیاند: پرسی بەهەمیشەییکردنی فەرمانبەرانی گرێبەست پەیوەستە بە گفتوگۆکانی نێوان هەولێر و بەغدا، چونکە زیادکردنی هەر کەسێک لەسەر میلاک، کێشە بۆ مووچە دروست دەکات.

 

لەلایەکی دیکەوە: گوتەبێژی وەزارەتی دارایی و ئابووری جەختی لەوە کردەوە: پرسی بەهەمیشەییکردنی فەرمانبەرانی گرێبەست، دۆسیەیەکی گرنگی سەردانەکەی ئەمجارەی شاندی حکومەتی هەرێم دەبێت بۆ بەغدا و گفتوگۆی لەسەر دەکرێ.

 

باکگراوند: لە کۆبووەنەوەی ژمارە 130ـی ئەنجوومەنی وەزیرانی هەرێمی کوردستان، کە 08-05-2024 ئەنجامدرا، ڕێکارەکانی بەهەمیشەییکردنی فەرمانبەرانی گرێبەست خرایەڕوو و لیژنەیەک بۆ بەدواداچوون لەسەر بابەتەکە پێکهێندرا.