مەسرور بارزانی: یەکێتی قوتابییان و یەکێتی لاوان ڕۆڵێكی گرنگیان لە بەدەستهێنانی مافەکانی قوتابییان و لاوان هەیە

ئاڤا نیوز

 

مەسرور بارزانی، جێگری سەرۆکی پارتی دیموکراتی کوردستان، پەیامێکی پیرۆزبایی بەبۆنەی 71ـەمین ساڵیادی دامەزراندنی یەکێتیی قوتابییان و یەکێتیی لاوانی دیموکراتی کوردستان بڵاوکردەوە و ڕایگەیاند، ڕۆڵێکی گرنگیان لە بەدەستهێنانی مافەکانی قوتابییان و لاوان هەیە. 

 

پەیامی پیرۆزبایی: مەسرور بارزانی، جێگری سەرۆکی پارتی دیموکراتی کوردستان وێڕای پیرۆزبایی لە یەکێتیی قوتابییانی کوردستان و یەکێتیی لاوانی دیموکراتی کوردستان ڕایگەیاند:

• "ڕۆڵێکی گرنگ و مێژوویەکی گەشیان لە بەدەستهێنان و پاراستنی مافەکانی قوتابییان و لاوان و پەرەپێدانی هزری نیشتمانپەروەری و بەرەوپێشبردنی توانا و ئاستی زانستی قوتابییان و لاوانی کوردستان و داکۆکیکردن لە دەسکەوتە نیشتمانییەکاندا هەیە".

• "هیوادارم لە کارکردن و ئامادەکارییەکانیان بۆ بەستنی کۆنگرە سەرکەوتووبن و لەژێر سەرکردایەتییەکی نوێ و بەهێز، گۆڕانکاریی ڕیشەیی و نوێخوازانە لە ڕێڕەوی خەباتی ڕێکخراوەیی یەکێتیی قوتابییان و لاوانی دیموکراتی کوردستاندا بکەن و بەرەو قۆناغێکی پێشەنگتری ببەن کە لە ئاست پێشکەوتن و گۆڕانکارییە هەنووکەییەکانی کوردستان و جیهاندا بن".

• "هیوادارم بە گیانێکی داهێنەرانەوە بەردەوام بن لە بەرەوپێشبردنی تواناکانی قوتابییان و لاوانی کوردستان بە سوودوەرگرتن لە پێشکەوتنەکانی سەردەم، بۆ ئەوەی بتوانن بەباشترین شێوە خزمەتی نیشتمانەکەیان بکەن".

 

باکگراوند: 71 ساڵ پێش ئێستا لە 18-2-1953 یەکێتیی قوتابیان و یەکێتیی لاوانی دیموکراتی کوردستان لە باشووری كوردستان دامەزرا، هەر لەگەڵ دامەزراندنی بووە بەشێكی گرنگ لە خەباتی پیشەیی و جەماوەری و لەنێو کورددا و بەدەیان سەركردەی پێگەیاندووە.