لە سلێمانی باندێکی گیرفانبڕ پێنج دەفتەر دۆلار لە هاووڵاتییان دەدزێت

ئاڤا نیوز

 

پۆلیسی سلێمانی گیرفانبڕێکیان دەستگیرکردووە، بەشێوەی باند لەگەڵ چەند کەسێکی دیکە دزییان کردووە، لەماوەی چەند ساڵێکدا لە بازاڕی سلێمانی پێنج دەفتەر دۆلاریان لە گیرفانی هاونیشتمانیان دزیوە.

 

وێنە گەورەکە: دیاردەی دزیکردن لە جانتا و گیرفان لە بازاڕەکان، یەکێکە لە شێوازە باوەکان، بەهۆی کامێرای چاودێرییەوە کارئاسانی زۆر بۆ پۆلیس کراوە بۆ زوو دۆزینەوەی تۆمەتباران. 

 

لێدوانی فەرمی: سەرکەوت ئەحمەد، گوتەبێژی پۆلیسی سلێمانی بە ئاڤا نیوزی گوت: دوای ئەوەی چەند هاونیشتمانییەک سکاڵایان تۆمارکرد لەبازاڕی سلێمانی پارە لە گیرفانیان دزراوە، بەدواداچوون کرا و تۆمەتبار (ت، ب، خ) دەستنیشان کرا، نووسینگەی ناوبازاڕی نەهێشتنی تاوانی سلێمانی تۆمەتبارەکەی دەستگیر کرد.

 

چیرۆکە سەرەکیەکە: تۆمەتبار خەڵکی بەغدایە و چەند ساڵێکە لە سلێمانی دەژی، لەگەڵ سێ کەسی دیکەی خەڵکی شارەکانی دیکەی ناوەڕاست و خوارووی عێراق باندێکی گیرفان بڕینیان دروستکردووە، کاتێک تۆمەتبار دەستگیرکراوە دانیناوە بەوەی لەماوەی ڕابردوودا 50 هەزار دۆلار واتا پێنج دەفتەر دۆلاریان لە گیرفانی خەڵک دزیووە.

 

زانیاریی زیاتر: سەرکەوت ئەحمەد دەڵێت: تەنیا یەک تۆمەتبار دەستگیرکراوە و پۆلیس بەدوای سێ تۆمەتبارەکەی ترەوەیە، نووسراو بۆ پۆلیسی بەغدا کراوە تا لەبارەی تۆمەتباران زانیارییمان بۆ بنێرن.