باڵیۆزی هۆڵەندا باس لە ڕۆڵی سەرۆك بارزانی لە شەڕی دژی داعش دەكات

ئاڤا نیوز

 

سەرۆك بارزانی و باڵیۆزی هۆڵەندا لە عێراق كۆدەبنەوە و بارودۆخی سیاسیی عێراق و ناوچەكە و پەیوەندییەكانی نێوان هەولێر و بەغدا تاوتوێ دەكەن.

 

وێنە گەورەكە: ڕۆژی دووشەممە 23-9-2024 لە سەڵاحەددین سەرۆك بارزانی پێشوازیی لە جانێت ئەلبێردا، باڵیۆزی هۆڵەندا لە عێراق و رولیوڤ ڤان ئیس، كونسوڵی گشتیی هۆڵەندا لە هەولێر كرد.

 

ڕاگەیێنراوی فەرمی: بارەگای بارزانی لەبارەی كۆبوونەوەكە ڕایگەیاند: باڵیۆزی هۆڵەندا لە عێراق پێزانینی هەبوو بۆ ڕۆڵی سەرۆك بارزانی لە سەركردایەتیكردنی شەڕی دژی تیرۆریستانی داعش، هەروەها ئاماژەی بە بەرەوپێشوەچوونی پەیوەندییەكانی نێوان وڵاتەكەی و هەرێمی كوردستان  کرد لە بوارە جیاجیاكان دا.

 

زانیاریی زیاتر: لە بەشێكی تری ئەو دیدارەدا كونسوڵی هۆڵەندا خۆشحاڵیی خۆی ڕاگەیاند بە ئەنجامدانی هەڵبژاردنی پەرلەمانی كوردستان لە ئۆكتۆبەری داهاتوو و هیواشی خواست ئەنجامەكانی هەڵبژاردن ببێتە هۆی بەهێزبوونی دامەزراوەكان و سەقامگیریی زیاتر لە هەرێمی كوردستان.

 

ئەوەش بزانە: لە دیدارەكەدا تیشك خرایە سەر بارودۆخی سیاسیی عێراق و ناوچەكە و دەرەنجامەكانی دوایین سەردانی سەرۆك بارزانی بۆ بەغدا و پەیوەندییەكانی نێوان حكوومەتی هەرێمی كوردستان و حكوومەتی عێراقی فیدڕاڵ، هەروەها بارودۆخی ناوخۆی هەرێمی كوردستان.