ڕووسیا لە بواری بۆشایی ئاسمان هاوکاریی وڵاتانی ئەفریقا دەکات

ئاڤا نیوز

 

ڕووسیا لەبواری بۆشایی ئاسمان هاوکاری وڵاتانی کیشورەی ئەفریقا دەکات و مۆسکۆ دەیەوێت یارمەتی ئەو وڵاتانە بدات مانگە دەستكردەكانیان بۆ خوولگەی زەوی هەڵبدەن.

 

چیرۆكی سەرەكی: وڵاتانی ئەندام لە هاوپەیمانی كەناراوەكانی ئەفریقا بەنیازن یەكەمین مانگی دەستكرد بەرەو خوولگەی زەوی بنێرن، بۆ ئەم ئەركەش دامەزراوەی "ڕووس كۆسمۆس"ـی ئاسمانی سەر بە حكومەتی ڕووسیا، هاوكارییان دەكات.

 

لێدوانی فەرمی: ئەلفۆسینی سانۆ، وەزیری ئابووری وڵاتی مالی، لە لێدوانێكی بۆ ئاژانسی هەواڵی ڕووسی "تاس" ڕایگەیاند، وڵاتانی ئەندام لە هاوپەیمانی كەناراوەكانی ئەفریقا ماوەی چەند ساڵێكە كار بۆ هەڵدانی یەكەم مانگی دەستكرد بۆ بۆشایی ئاسمان دەكەن و بۆ ئەم ئەركەش مۆسكۆ هاوكاری سەرەكی هێنانەدی ئەو خەونەکەیان دەبێت.

بۆچی گرنگە: وڵاتانی ئەفریقا بەم هەنگاوەیان مەبەستیانە هاوشێوەی زۆرێك لە وڵاتانی دیكە، لە ئەزموونی بۆشایی ئاسمان سوودمەندبن بە مەبەستی بەهێزكردنی ئامرازەكانی پەیوەندیكردنی ڕادیۆیی و تەلەفزیۆنی و خێراكردنی هێڵی ئینتەرنێت.

 

خاڵە ئەرێنییەکان: یەکێکی دیکە لە ئامانجەکانی هەماهەنگی نێوان وڵاتانی ئەفریقا و مۆسکۆ لە بواری بۆشاییی ئاسمان بۆ هەڵدانی مانگی دەستکرد،  چاودێریكردنی گۆڕانكارییەكانی كەشوهەوای كیشوەری ئەفریقا و ئەگەری بەرەنگاربوونەوەی ڕووداوە سروشتییەكانە.