ئاڤا وردەکاریی ماستەرپلانی 30 ساڵی ئایندەی هەولێر ئاشکرا دەکات

ئاڤا نیوز

 

کارکردن لەسەر نەخشەی ماستەرپلانی هەولێر بەردەوامە و تاوەکو ئێستا 90%ـی کارەکانی بە ڕەچاوکردنی سەرجەم سێکتەرە خزمەتگوزارییەکانەوە تەواو کراوە.

 

وێنە گەورەکە: شارەوانی هەولێر بە نوێنەرایەتی سەرجەم وەزارەتەکان و فەرمانگە پەیوەندیدارەکانی حکومەتی هەرێمی کوردستان، کار لەسەر نوێکردنەوە و فراوانکردنی ماستەرپلانی درێژخایەنی هەولێر دەکات.

 

لێدوانی فەرمی: کارزان هادی، سەرۆکی شارەوانیی هەولێر بە ئاڤا نیوزی ڕاگەیاند: ماستەرپلانی کورتخایەن و درێژخایەن هەیە، ئەم ماستەرپلانەی کە بۆ 30 ساڵی ئایندە کاری لەسەر دەکەین، توانیومانە ئەو کێشانەی کە مەحاڵ بوون چارەسەر بکرێن و لە چوارچێوەی ماستەر پلانەکە جێیان بکەینەوە.

 

زانیاریی زیاتر: لە ماستەرپلانی نوێی هەولێردا، سێکتەرەکانی خزمەتگوزاری، هێڵی شەمەندەفەر، ڕێژەی سەوزایی بەگوێرەی ستانداردە جیهانییەکانن، ئەو زۆنانەی بۆ زیادکردنی حەوزەکانی ئاوی ژێر زەوی دانراوە هەمووی ڕەچاوکراوە و وەک سەوزای دەهێڵدرێنەوە.

 

قوڵتر: لە ماستەرپلانەکەدا پرۆژەکانی پیشەسازیی قورس، بۆ ئەوەی دووکەڵ و پاشماوەکانیان بە ئاراستەی ناو شار نەیەت، بەگوێرەی ئاراستەی با و جۆری خۆڵ و چەند پێوەرێکی دیکە شوێنەکانیان دیاری دەکرێن.

 

بابەتە ستراتیژییەکانی: سەرۆکایەتی شارەوانیی هەولێر بۆ تەواوکردنی شەقامی 150 مەتری، پێشنیازی بۆ ئەنجوومەنی وەزیران بەرزکردووەتەوە و چاوەڕوانی وەڵامە، پلانەکەی ئەوەیە لە ئایندەیەکی نزیکدا ئەو پرۆژەیەش تەواو بکەن.

 

ئەوەی پێویستە بیزانیت: لە ماستەرپلانی نوێی هەولێر دا، جگە لە شەقامەکانی 120 مەتری و 150 مەتری، شەقامێکی دیکە لە چواردەوری هەولێر دروست دەکرێت.