عێراق 400 ملیۆن دۆلار بۆ پاککردنەوەی کێڵگەکانی مین لە بەریتانیا قەرز دەکات

ئاڤا نیوز

 

حکومەتی عێراق بە مەبەستی پاککردنەوەی کێڵگەکانی مین و تەقەمەنی داوای قەرزی لە بەریتانیا کردووە، پشکی هەرێمی کوردستانیش لەو بڕە قەرزەدا هەیە.

 

چیڕۆکی سەرەکی: لە سەرەتای مانگی پێنجی ئەمساڵ بڕى 400 ملیۆن دۆلار له‌لایه‌ن وه‌زاره‌تى ژینگه‌ى عێراقەوە بۆ پڕۆسه‌ى پاكسازى مین و ته‌قه‌مه‌نى له‌ وڵاتى به‌ریتانیا قه‌رز كراوه‌، پشکی هەرێمی کوردستانیش لەو بڕە قەرزەدا دابینکراوە.

 

لێدوانی فەرمی: عه‌لى میرانى، به‌ڕێوه‌به‌رى گشتى ته‌كنیكی له‌ ده‌زگاى مینی هەرێمی کوردستان، بە ئاڤا نیوزی راگه‌یاند: وه‌زاره‌تى ژینگه‌ى عێراق بە مەبەستی پاككردنه‌وه‌ى مین و ته‌قه‌مه‌نىیەکان، گوژمەیەک پارەی لە بەریتانیا قەرز کردووە کە 400 ملیۆن دۆلارە.

 

زانیاریی زیاتر: هه‌رێمی کوردستان لەو گوژمەیەدا 12,67%ـى بەردەکەوێت، ئەویش دوای ئەوە دێت کە وەزارەتی ژینگەی عێراق ڕەزامەندی لەسەر پشکی هەرێمی کوردستان دا، ئێمەش پڕۆژه‌یه‌كی تێروته‌سه‌لمان داوه‌ته‌ وه‌زاره‌تى ژینگه‌ی عێراق كه‌ پشكی هەرێمی کوردستان له‌ چ پڕۆژه‌یه‌كی پاكسازىی خه‌رج بکرێ.

 

ئەوەی پێویستە بیزانیت: به‌پێی ڕێكکه‌وتننامه‌ى ئۆتاوا، پێویسته‌ ته‌واوى عێراق تا ساڵى 2028 له‌ مین و ته‌قه‌مه‌نییه‌كان پاك بکرێتەوە.

 

ئەوەش بزانە: ڕێكکه‌وتننامه‌ی ئۆتاوا له‌ ساڵی 1997 له‌ نێوان زیاتر له‌ 120وڵاتی جیهان له‌ شاری ئۆتاوای پایته‌ختی كەنەدا بۆ قه‌ده‌غه‌كردنی به‌كارهێنان و عه‌مباركردن و به‌رهه‌مهێنان و گواستنه‌وه‌ی مینی دژه‌كه‌سی واژۆ كرا، عێراقیش له‌ ساڵی 2008 به‌شداری له‌ ڕێكه‌وتنه‌كه‌ كرد كه ‌دەبوو لە ماوه‌ی 10 ساڵدا تەواوی خاکی عێراق بە هەرێمی کوردستانیشەوە لە تەقەمەنی و مینی دژە کەسی پاک بکاتەوە.