وەزیری شارەوانی: لە دوو هەفتەی داهاتوودا دابەشکردنی زەوی دەستپێدەکات

ئاڤا نیوز

وەزارەتی شارەوانی و گەشتوگوزار ڕێکارەکانی دابەشکردنی زەوی بەسەر فەرمانبەران دەستپێدەکات، یەکەم شوێن ئیدارەی سەربەخۆی زاخۆیە زەوی لێ دابەش دەکرێت.

 
لێدوانی فەرمی: ساسان عەونی، وەزیری شارەوانی و گەشتوگوزار لە گەشتی هەواڵەکانی کاتژمێر 7:00ی ئاڤا ڕایگەیاند: بەهۆی زوو تەواو بوونی ڕێکارەکانی دابەشکردنی زەوی لە ئیدارەی سەربەخۆی زاخۆ، لە دوو هەفتەی داهاتوودا یەکەمجار لەوێ دەست بە دابەشکردنی زەوی دەکەین، ئەو فەرمانبەرانەی هەشت ساڵ خزمەتیان تێپەڕاندووە وەرگرتنی زەوی دەیانگرێتەوە و ئەوانەشی لە ڕابردوودا بڕیاری وەرگرتنی زەوییان هەبووە ئەمجارە زەوی وەردەگرن.

 
زانیاریی زیاتر: وەزیری شارەوانی و گەشتوگوزار باسی لەوەشکرد: ئەو زەوییانەی دابەش دەکرێن بەهاکەیان گونجاو و باشە و بەزووترین کات خزمەتگوزارییان پێ دەگەیێنرێت، دابەشکردنی زەوی هەموو شارەکان و قەزا و ناحیەکان دەگرێتەوە.

 

سەبارەت بە جێبەجێکردنی ماستەرپلانی هەڵەبجە، وەزیری شارەوانی و گەشتوگوزار باسی لەوە کرد: کۆمپانیایەکی گەورەی لوبنانی بە بڕی یەک ملیار دینار ماستەرپلانی هەڵەبجەیان داناوە، لەگەڵ ئەوەشدا 78 پڕۆژە بە گوژمەی 51 ملیار دینار بۆ هەڵەبجە جێبەجێکراوە.

 

ئەوەی پێویستە بیزانیت: ساسان عەونی، لەبارەی تەواوکردنی شەقامی 100 مەتری شاری سلێمانی دەڵێت: سەرۆکوزیران مەسرور بارزانی فەرمانی دەرکردووە هەموو ئاسانکارییەک بکرێت بۆ تەواوکردنی ئەو شەقامە و کۆتایی ئەمساڵ بەشی هەرە زۆری کارەکانی تەواودەکرێت و بەڕووی هاونیشتمانیان دەکرێتەوە.