حیزبوڵڵای لوبنان شوێنگرەوەی حەسەن نەسروڵڵا دەستنیشان دەکات

ئاڤا نیوز

 

دوای دوو ڕۆژ لە کوژرانی حەسەن نەسروڵڵا، ئەنجوومەنی شورای حیزبکە هاشم سەفیەدینی بەشێوەیەکی نافەرمی وەک ئەمینداری گشتی حیزبوڵڵا هەڵبژاردووە.

 

وێنە گەورەکە: ڕۆژی شەممە 28-9-2024، سوپای ئیسرائیل کوژرانی حەسەن نەسروڵڵای لە هێرشێکدا بۆ سەر باڵەخانەیەک لە بەیرووت ڕاگەیاند، دوای چەند کاتژمێرێکیش حیزبوڵڵا کوژرانی سەرکردەکەیانی پشتڕاست کردەوە.

 

زانیاریی بەدەستهاتوو: چەند سەرچاوەیەک بۆ کەناڵی ئەلعەرەبیە ئەوەیان پشتڕاست کردووەتەوە کە ئەنجوومەنی شورای حیزبوڵڵا هاشم سەفیەدینی وەک ئەمینداری گشتی هەڵبژاردووە.

 

ئەوەی پێویستە بیزانیت: هاشم سەفیەدین، ئامۆزای حەسەن نەسروڵڵا لە پێشەنگی لیستی ئەو کەسانە دێ کە ببێتە جێنشینی نەسروڵڵا، بەتایبەتی دوای ئەوەی ئیسرائیل زۆرینەی سەرکردە باڵاکانی ئەو حیزبەی کوشتووە.

 

ئەمەش بزانە: پێگەی هاشم سەفییەدین لەناو حیزبوڵڵا دا، بە هۆی پەیوەندییە نزیکەکانی بووە لەگەڵ سەرکردایەتی ئێران، بەو پێیەی لە قوم خوێندوویەتی و لەگەڵ بەرپرسانی باڵای تاران پەیوەندیی نزیکیی هەبووە، هاوکات کوڕەکەی لەگەڵ کچی قاسم سولەیمانی، فەرماندەی پێشووی فەیلەقی قودسی سوپای پاسداران، هاوسەرگیریی کردووە، ئەمەش وایکرد ببێتە جێگرەوەیەکی بەهێز بۆ سەرکردایەتیی حیزبوڵڵا لە دوای حەسەن نەسروڵڵا.