هاتووچۆی هەولێر هەڵمەتێک بۆ لابردنی پۆستەری بەربژێران دەستپێدەکات

ئاڤا نیوز

 

لە دوای دەستپێکی هەڵمەتی بانگەشەی هەڵبژاردن تابلۆ و پۆستەری بەربژێر و حیزبەکان لە شوێنە قەدەغەکراوەکان گرفتی بۆ هاتووچۆ شۆفێران دروستکردووە و زیانی بە ئۆتۆمبێلەکانیان گەیاندووە، ئەمەش سکاڵای هاووڵاتیانی بەدوای خۆیدا هێناوە.

 

وێنە گەورەکە: ڕۆژی 25-9-2024، بانگەشەی هەڵبژاردنی خولی شەشەمی پەرلەمانی کوردستان دەستیپێکرد، لە ڕۆژی بڕیارە 15-10-2024 ماوەی بانگەشە کۆتایی بێت.

 

لێدوانی فەرمی: عەقید هێمن ئەمین، گوتەبێژی بەڕێوەبەرایەتی هاتووچۆی هەولێر، بە ئاڤا نیوزی ڕاگەیاند: "تابلۆ و پۆستەری بەربژێر و حیزبەکان لە ترافیکلایت و شوێنی سوڕانەوەی شۆفێران و بەردەم کامێرای تۆمارکردنی سەرپێچی دانراون، ئێستا هەڵمەتێک بۆ لابردنیان دەستپێکراوە".

 

زانیاریی زیاتر: بەڕێوەبەرایەتی هاتووچۆی هەولێر و شارەوانی پێکەوە کار بۆ لابردنی سەرپێچیەکان دەکەن، ئەم هەڵمەتەشیان بۆ پاراستینی شۆفێران و ئاسانکاری بینینیانە.

 

ئەوەی پێویستە بیزانیت: چەندین ڕووداوی کەوتنە خوارەوەی  تابلۆ و پۆستەرەکان تۆمارکراوە کە بووەتە هۆی زیان گەیاندن بە ئۆتۆمبێلی هاووڵاتیان.

 

لە لایەکی دیکەوە: پێشتر کارزان هادی، سەرۆکی شارەوانی هەولێر بە ئاڤا نیوزی ڕایگەیاند، "لایەنەکان و بەربژێرەکان ئاگادار دەکەینەوە دەبێت لەماوەی 24 کاتژمێردا پۆستەرەکانیان لە شوێنە قەدەغەکراوەکان لابدەن، ئەگەرنا خۆمان لایان دەدەین و هەر نۆ بەڕێوەبەرایەتیی شارەوانی ڕاسپێردراون سەرپێچییەکان لابدەن".

 

باکگراوند: هەڵبژاردنی پەرلەمانی کوردستان بڕیارە 20-10ی ئەمساڵ بکرێت.