ڕێکخەری نوێی گۆڕان پەیامی دەبێت؛ بەشداریکردن لە هەڵبژاردن دووپات دەکاتەوە

ئاڤا نیوز

هەرچەندە بەهۆی ناكۆكییە نێوخۆییەكان بزووتنەوەی گۆڕان بووە بە دوو بەشەوە، بەڵام ڕێكخەری نوێی حیزبەكە بەشدارییكردنی گۆڕان لە هەڵبژاردن دووپات دەكاتەوە.

 

لێدوانی فەرمی: جەلال مستەفا، سەرۆکی جڤاتی گشتیی بزووتنەوەی گۆڕان بە ئاڤا نیوزی ڕاگەیاند: ئەمشەو دانا ئەحمەد مەجید، ڕێکخەری گشتیی بزووتنەوەکە لە کەناڵی کەی ئێن ئێن، لەبارەی پرسی هەڵبژاردن، ئاڵۆزییەکانی نێوان بزووتنەوەکە و داخستنی دەرگای گردی زەرگەتە بەڕووی هەڵسوڕاواندا قسە دەکات".

ئەوەی پێویستە بیزانیت: بزووتنەوەی گۆڕان بەسەر دوو باڵ دابەش بووە، باڵی عومەری سەید عەلی کە بێ هەڵبژاردن دانا ئەحمەد مەجیدیان وەکو ڕێکخەری نوێی گۆڕان دەستنیشان کرد، لەگەڵ باڵی نما و چیا، کوڕانی نەوشیروان مستەفا. دەنگۆی ئەوەیە دانا ئەحمەد مەجید لەگەڵ بەشداریکردن لە هەڵبژاردن بێت و کوڕانی نەوشیروان مستەفاش ڕەتیدەکەنەوە گۆڕان بەشداریی هەڵبژاردن بکات.


لەمباریەوە: جەلال مستەفا، سەرۆکی جڤاتی گشتیی بزووتنەوەی گۆڕان ڕایگەیاند: تا ئێستا هیچ شتێک لەبارەی بەشدارینەکردن لە هەڵبژاردن لای ئێمە نەگوتراوە، بەربژێرەکانمان بانگەشە دەکەن و ئێمەش پشتگیرییان دەکەین، ئیتر نازانم ئەگەر شتێکی نوێ و کتوپڕ بێتە پێشەوە".

لەلایەکی دیکەوە: لەبارەی گواستنەوەی مەکۆی سەرەکی گۆڕان لە گردی زەرگەتەوە بۆ گەڕەکی کوردسات، سەرۆکی جڤاتی گشتیی گۆڕان بۆ ئاڤا نیوز گوتی: "مەکۆی سەرەکی هەر لە گردی زەرگەتە دەبێت، ئەوەی دەگوازرێتەوە مەکۆی سەرەکیی گۆڕان نییە".