بنه‌ماڵه‌ی سابیر عه‌لكه‌: مەبەستی هاتنی شاڵاو کۆسرەت بۆ پرسەكەمان ئاژاوە بوو

ئاڤا نیوز

 

بنەماڵەی شەهید سابیر عەلكە، خاوەنی ئەو پرسەیەی شاری هەولێرن كە ئەمڕۆ گرژی و ئاڵۆزی تێیدا ڕووی دا، ڕوونكردنەوە دەدەن و ڕایدەگەیێنن كە مەبەستی چوونی شاڵاو كۆسرەت بەو ژمارە زۆرەی چەكدارەوە بۆ پرسەكە بۆ ئاژاوە بووە نەك پرسە.

 

وێنە گەورەكە: ئەمڕۆ دووشەممە 30-9-2024، دوای چوونی شاڵاو كۆسرەت ڕەسوڵ بۆ پرسەیەك لە مزگەوتی ڕەشاد موفتی لە شاری هەولێر، گرژی و ئاڵۆزی لەنێوان پاسەوانەكانی شاڵاو كۆسرەت و خاوەنی پرسەكە ڕوویدا، دواتر پاسەوانەكان دەستڕێژی گوللەیان كرد و بەو هۆیەوە كەسێك بە گوللە بریندار بوو.

 

ڕاگەیێنراوی فەرمی: بنه‌ماڵه‌ی شه‌هید سابیر عه‌لكه‌ كە خاوەنی پرسەكەن ڕوونكردنەوەیەكیان بڵاوكردەوە و تیایدا ئاماژەیان بە ئەوە دا: پرسەكە هی عه‌شیره‌تی مه‌نتكه‌ و پرسه‌ی  پارتییه‌كان بوو، له‌و كاته‌دا شاڵاو كۆسره‌ت ڕه‌سول كه‌ سه‌رۆكی لیستی یه‌كێتییه‌ هاته‌ پرسه‌كه‌ و به‌خۆی و كۆمه‌ڵێك چه‌كدار كه‌ زیاتر له‌وه‌ ده‌چوو بۆ ئاژاوه‌ هاتبێ نەك سه‌ردانی پرسه‌.

 

لەلایەكی دیكەوە: بنەماڵەكە ڕایدەگەیێنن: ئێمه‌ كه‌ خاوه‌نی كۆمه‌ڵێك شه‌هیدین و شه‌هید سابیر عه‌لكه‌ و شه‌هید ڕه‌شید عه‌لكه‌ به‌ ده‌ستی كۆسره‌ت ڕه‌سوڵ عه‌لی شه‌هید كراون، له‌به‌ر ڕێزمان بۆ پرسه‌كه‌مان  سه‌ره‌تا شوێنی دانیشتنیشمان بۆ شاڵاو و ئه‌و خه‌ڵكه‌ی له‌گه‌ڵی بوون دیاری كرد، بەڵام هه‌ر دیاربوو كه‌ ئه‌وان به‌ مه‌به‌ستی ئاژاوه‌ هاتبوون تاوه‌كو ئارامی شاری هه‌ولێر تێك بده‌ن و ئیدی شه‌ڕ و گرژی دروست بوو.

 

زانیاریی زیاتر: بەپێی ناوەڕۆكی ڕوونكردنەوەكە، پاسەوانەكانی شاڵاو كۆسرەت دەستیان كردووە بە تەقە و بەو هۆیەوە كەسێك بریندار بووە، ڕاشیدەگەیێنن "ئه‌گه‌ر مه‌به‌ستیان ئاژاوه‌ نه‌بێ دوو مانگ پێش ئێستا خێزانی شه‌هید سابیر عه‌لكه‌ كۆچی دوایی كردووە، بۆچی شاڵاو نەچووەتە پرسەكەی؟".