ئەنجوومەنی ئاسایش دانپێدانانی سووتێنەرانی بازاڕەکان بڵاودەکاتەوە

ئاڤا نیوز 

 

ئەنجوومەنی ئاسایشی هەرێمی کوردستان لە ڕاگەیێنراوێکدا دانپێدانانی ئەندامێكی ئەو گرووپەی بڵاوکردەوە کە بازاڕەکانی هەرێمی کوردستانیان سووتاند.

 

وێنە گەورەکە: بازاڕی قەیسەریی و لەنگەی هەولێر، بەشێک بوون لەو چەندین بازاڕ و شوێنەی لە شارەکانی هەولێر، كەركووك و دهۆك لە لایەن باندێكی سەر بە پەكەكە سووتێنران و بەهۆیەوە سەدان دووكاندار زەرەرمەند بوون.

 

دانپێدانانی فەرمی: ڕەنج حەبیب سۆراب، کە ئەندامی گرووپەکەیە و ڕاستەوخۆ بەشدار بووە لە سووتاندنی چەند شوێنێک، دەڵێت لەلایەن هەواڵگریی پەکەکەوە پارەی پێدراوە بۆ ئەوەی ئەو کارە بکات.

چیرۆکی سەرەکی:  ڕەنج حەبیب ناسراو بە (کاروان) لەدایکبووی ساڵی1992ی هەڵەبجە و دانیشتووی سلێمانی، وەک خۆی دەڵێت لە سەردەمی زانکۆ هاوڕێیەکی هەبووە بە ناوی هونەر فەخرەدین و خەڵکی کەلار بووە، سەرەتای ساڵی 2023 پەیوەندی پێوە دەکات کەسێک لە هەواڵگریی پەکەکە ببینێت، ئەویش قبووڵی دەکات و کاتێک چاویان بەیەک دەکەوێت دەزانێت ئەو کەسە ئاشتی فەخرەدین ناسراو بە (زاگرۆس گەرمیانی) برای هونەر فەخرەدینە. ئەوکات داوای لێکراوە لە تورکیا کاری گێرەشێوێنی بکات بەڵام ڕەتی کردووەتەوە.

زانیاریی زیاتر: دواتر هونەر فەخرەدین [کارمەندی هێزەکانی یەکەی 70] داوای لێدەکات لە هەولێر کاری گێرەشێوێنی بکات و لەبەرامبەردا هاوکاریی ماددی دەکات، ئەویش قبووڵی دەکات، یەکەم چالاکیشی دێتە هەولێر و لەگەڵ کەسێکی دیکە شەش بۆمب لە ناو بازاڕی لەنگەی هەولێر دادەنێنەوە و دواتر بازاڕەکە دەسووتێت.

دواتر چی ڕووی دا: ڕەنج حەبیب دوای چەند چالاکییەکی دیکە، ڕۆژێک لەلایەن پەکەکە ئاگادار دەکرێنەوە کە چەند ئەندامێکی گرووپەکە گیراون، پێیان دەڵێت بڕۆنە بەردەم فامیلی مۆڵ بڕی دوو هەزار و 500 دۆلاری وەربگرن بەمەبەستی چوونەدەرەوە لە کوردستان، دواتر لە ڕێگەی رائید دەشتی کە ئەفسەرێکی دژە تیرۆری سلێمانییە، ئاشتی فەخرەدین بە ئۆتۆمبێلی دژەتیرۆر لە مەرزی پەروێزخان چووەتە ئێران، ئەویش لەڕێگەی مەرزی تەوێڵەوە ڕایکردووە. 

گۆشەیەکی دیکە: کاتێک دەچنە ئێران یەک دەگرنەوە و ئاشتی فەخرەدین داوای لێدەکات وەکو تۆڵەیەک کاری گێرەشێوێنی لە ئێران بکەن، بەڵام ڕەتیکردووەتەوە، دواتر گەڕاوەتەوە هەرێمی کوردستان و خۆی ڕادەست کردووە، ئەنجوومەنی ئاسایشی هەرێمی کوردستان دەڵێت ڕۆژی 10-7-2024 دەستگیرکراوە.

باکگراوند:ڕۆژی 01-07-2024 وەزارەتەکانی ناوخۆی هەرێمی کوردستان و عێراق دەستگیرکردنی "تۆڕێکی پەکەکەی سێ کەسی"یان بەتۆمەتی سووتاندنی بازاڕەکانی هەولێر، دهۆک و کەرکووک ڕاگەیاند.