نزیکەی نۆ هەزار پێشمەرگە و پلەداری وەزارەتی پێشمەرگە پلەیان بەرز دەکرێتەوە

ئاڤا نیوز

لە چوارچێوەی بەدامەرزاوەییکردنی هێزەکانی پێشمەرگە و یەکخستنەوەیان، پلەی نزیکەی نۆ هەزار پێشمەرگە بەرز کرایەوە.

بۆچی گرنگە: پلەبەرزکردنەوەی ئەفسەرانی پێشمەرگە یەکێکە لە هەنگاوەکانی حکومەتی هەرێمی کوردستان بۆ یەکخستن و بەدامەزراوەییکردنی سەربازییانەی هێزی پێشمەرگەی کوردستان، دوای دەرچوونی بڕیارەکەش جیاوازی مووچەکەیان بۆ خەرج دەکرێت.

ڕاگەیێنراوی فەرمی: ئەمڕۆ چوارشەممە 15-10-2025، وەزارەتی پێشمەرگە ڕایگەیاند، لە خشتەی مانگی نۆی 2025، پلەی هەشت هەزار و 721 پێشمەرگە و پلەداری سەر بە وەزارەتی پێشمەرگە بەرزکرایەوە.

بەپێی ڕاگەیێنراوەکە، پلە بەرزکردنەوەکان بە دوو لیست کراوە، لە لیستی یەکەم چوار هەزار و 270 پێشمەرگە و پلەدار ناویان هاتووە، هەروەها لە لیستی دووەم چوار هەزار و 451 پێشمەرگە و پلەدار ناویان لە لیستەکەدایە.

لێدوانی فەرمی: لیوا عوسمان ڕیشە، وتەبێژی وەزارەتی پێشمەرگە بە ئاڤای ڕاگەیاند، ساڵانە دووجار لیستی پلەبەرزکردنەوەی پێشمەرگە و پلەدارەکانی سەر بە وەزارەتی پێشمەرگە بەرز دەکرێتەوە. دەشڵیت هەموو ئەو کەسانەی کە بەپێی پلەی سەربازی و بڕوانامەکانیان مافیان هەیە، پلەکانیان بەرز دەکرێتەوە.

لەلایەکی دیکەوە: شۆڕش ئیسماعیل، وەزیری پێشمەرگە لە پەیامێکدا وتی، دابینکردنی مافەکانی پێشمەرگە و باشترکردنی ژیان و گوزەرانیان، لە پێشینەی کاری حکومەتی هەرێمی کوردستان و وەزارەتی پێشمەرگە و پڕۆسەی چاکسازیی دەبێت.

داواش دەکات، لە بەرامبەر بەرزکردنەوەی شایستەی پلەکانیان، دەبێت پێشمەرگە وەک هەمیشە لەئەرکی پاراستنی خاک و سنوور و خەڵکی کوردستان و جێبەجێکردنی دیسپلینی سەربازییانەی سەردەمی بەردەوام بن.

ئەوەی پێویستە بیزانیت: پلەبەرزکردنەوەی پێشمەرگە تاوەکو پلەی جێگری ئەفسەر، ڕاستەوخۆ بە فەرمانی وەزیر ئەنجام دەدرێت، بەڵام پلەبەرزکردنەوەی ئەفسەران لە وەزارەتی پێشمەرگەوە ڕەوانەی ئەنجوومەنی وەزیران دەکرێت و دوای ڕەزامەندیی ئەنجوومەنی وەزیران، دەبێت سەرۆکی هەرێمی کوردستان مەرسومی بۆ دەربکات، دواتر بۆ وەزارەتی پێشمەرگە ڕەوانە دەکرێتەوە و دەچێتە باری جێبەجێکردنەوە.