پارتی: مووسڵ وەکو هەولێر و شارەکانی کوردستان لێ دەکەین

ئاڤا نیوز

پارتی دیموکراتی کوردستان لە پارێزگای نەینەوا بەشداری هەڵبژاردن دەکات و لە ڕێگەی 61 کاندیدەوە هەوڵی بەدەستهێنانی زۆرترین کورسی پارێزگاکە دەدات.

وێنە گەورەکە: ڕۆژی 11-11-2025 هەڵبژاردنی پەرلەمانی عێراق بەڕێوەدەچێت، پارتی دیموکراتی کوردستان بە لیستی ژمارە 275 بەشداری لەو هەڵبژاردنە دەکات، بۆ ئەم مەبەستەش دەستی بە بانگەشەی هەڵبژاردن کردووە.

لێدوانی فەرمی: نەوزاد هادی، بەرپرسی مەکتەبی ڕێکخستنی پارتی لە پارێزگای نەینەوا، بە ئاڤای گوت: لە هەڵبژاردنی ڕابردوودا دەنگەکانی پارتی لە نەینەوا زیادی کرد، بۆ ئەم هەڵبژاردنەش کار لەسەر ئەوە دەکەین دەنگەکانمان و کورسیەکانمان لەم پارێزگایە زیاتر بێت.

ئەوەی پێویستە بیزانیت: پارتی دیموکراتی کوردستان زۆرترین کاندیدی لە پارێزگای نەینەوا داناوە کە ژمارەیان 63 کاندیدە، لە رێگەیانەوە هەوڵی بەدەستهێنانی زۆرترین ژمارەی دەنگدەرانی پارێزگاکە و زۆرترین ژمارەی کورسی دەدات.

زانیاریی زیاتر: پارێزگای نەینەوا 34 کورسی بۆ دیاریکراوە، 31 کورسی گشتی، یەک کورسی کۆتای ئێزدی، یەک کورسی کۆتای شەبەک و یەک کورسی کۆتای کریستیان. دوو ملیۆن و 102 هەزار و 429 کەس مافی دەنگدانی هەیە.

باکگراوند: لە هەڵبژاردنی ڕابردووی پەرلەمانی عێراق کە لە مانگی 10ـی ساڵی 2021 بەڕێوەچوو، پارتی لەسەر ئاستی هەشت بازنەی هەڵبژاردن لە نەینەوا توانی 158 هەزار و 627 دەنگ بەدەستبهێنێت و نۆ کورسی بەدەست هێنا، بەڵام لەم هەڵبژاردنە هەموو پارێزگای نەینەوا یەک بازنەیە.