سەنتەری زانست؛ پرۆژەیەکی گەورە و سەرنجڕاکێش بۆ داهێنان لە هەولێر

ئاڤا نیوز

 

مەسرور بارزانی، سەرۆکوەزیرانی کوردستان دوای دانانی بەردی بناغەی سەنتەری زانست لە هەولێر داوای لە کەسانی بەهرەمەند و داهێنەر کرد، "لە ناوخۆ و دەرەوەی هەرێمی کوردستان لە ڕێگەی ئەم سەنتەرەوە پەرە بە بیرۆکە و توێژینەوەکانیان بدەن و بیکەنە ناوەندێکی گرنگی داهێنان".

 

چیرۆکی سەرەکی؛ پرۆژەکە سەنتەرێکی حکومییە و ناوی زانستە، سەر بە پەیمانگای داهێنان و نوێگەری کوردستانە- کەی ئای ئای. دەکەوێتە لەسەر شەقامی 150 مەتری لەنێوان کەسنەزان و ڕێگای پیرمام لە هەولێر. لەسەر ڕووبەی 200 هەزار مەتر دووجا دروست دەکرێت بە سێ قۆناغ. پڕۆژەکە هەمەجۆرە و لە شێوەی پارکە، دیزاینەکەی زۆر سەرنجڕاکێشە، سێ باڵەخانەی گەورەی تێدایە لە شێوەی شاخ، هەریەکەیان سەربەخۆن و هاوشێوەی زنجیرە چیا خۆیان دەنوێنن، گرد و ڕووبار و سەوزاییەکی فراوانیشی تیا دەبێت.

ناوەندی توێژینەوە، تاقیگە، ئۆفیسی کارکردن، پێشانگا، هۆڵی گەورە بۆ سمینار و کۆنفرانس، ڕێستۆرانت، هۆڵی وەرزش، مەلەوانگە، مارکێت، شوێنی ڕاهێنان، شووققە، باخچەی دڵڕفێن و گەراجی تیایە، شوێنی داهێنانە.

زانیاریی زیاتر؛ لە وڵاتە پێشکەوتووەکانیش ئەم جۆرە پارکانە وەک ناوچەیەکی تایبەت بۆ داهێنان و پەرەپێدانی پیشەسازی و تەکنەلۆجیا دروستکراون.

سەنتەرەکە چەند کارێکی دەبێت لەوانە:

٠ کۆکردنەوەی داهێنەران و بەهرەمەندان و پسپۆڕان لە کوردستان و ناوچەکە.
٠ پشتگیریکردنی ئەو بزنسانەی لەسەر بنەمای داهێنان دامەزراون و ئاستێکی بەرزیان هەیە. 
٠ دروستکردنی پەیوەندی و هەماهەنگیکردن لەگەڵ ناوەند و کۆمپانیا ناوخۆیی و نێودەوڵەتییەکان، بەمەبەستی کار و داهێنانی هاوبەش. 
٠ پەیوەندی و کاری هاوبەش لەگەڵ زانکۆ و پەیمانگە و ڕێکخراوەکانی کوردستان، ئەوانەی توانای بەرهەمهێنانیان هەیە. 
٠ئەنجامدانی توێژینەوە بە پراکتیکی.
٠ڕەخساندنی دەرفەتی جۆراوجۆری کارکردن بۆ گەنجان.

لێدوانی فەرمی؛ مەسرور بارزانی لە مەراسیمی دانانی بەردی بناغە گوتارێکی پێشکەش کرد و گوتی: لە زۆر بوار و سێکتەری جیاواز وەبەرهێنانی زۆرمان کردووە، ئەمجارە وەبەرهێنان لە هزر و بیری گەنجان دەکەین کە گەورەترین سەرمایەی ولاتەکەمانن، ئومێدێکی یەکجار زۆرم هەیە ئەم پرۆژەیە دەبێتە پرۆژەیەکی زۆر گەورە بۆ خزمەتکردن و پێشخستنی کوردستان. 

سەرۆکوەزیرانی کوردستان لە وەسفی گەنجانی کوردستاندا گوتی: گەنجی بەهرەمەندمان زۆرە، بەڵام ڕەنگە بەهۆی نەبوونی دەرفەت و شوێنی گونجاو بە پەرەپێدانی توانا و بەهرەکانیان نەتوانراوە وەکو پێویست سوود لە بیرۆکە و داهێنانەکانیان وەربگیرێت، داوا لە کەسانی بەهرەمەند و داهێنەر دەکەین، لە ناوخۆ و دەرەوەی هەرێمی کوردستان لە ڕێگەی ئەم سەنتەرەوە پەرە بە بیرۆکە و توێژینەوەکانیان بدەن و بیکەنە ناوەندێکی گرنگی داهێنان.

 
لەلایەکی دیکە: مەسرور بارزانی پشتیوانی تەواوی خۆی و حکومەتی بۆ سەنتەرەکە راگەیاند، لە کۆتایی گوتارەکەشیدا گوتی: دەمانەوێت کوردستان ببێتە ئەو شوێنەی گەنجەکانمان لێرە بتوانن بیرۆکەکانیان بکەن بە پرۆژە.