سەرۆكوەزیران بارزانی کارگەیەکی دروستکردنی سرنج لە هەولێر دەکاتەوە

ئاڤا نیوز 

 

سەرۆکوەزیران بارزانی لەکاتی کردنەوەی کارگەیەکی پێدوایستی پزیشکی لە هەولێر ڕایگەیاند، هەر وەبەرهێنەرێك، هەر كەسێك كە توانای ئەوەی هەیە بتوانێت لە كوردستان وەبەرهێنان بكات، حكومەت یارمەتیدەریان دەبێت، پاڵپشتیان دەبن و هەموو کارئاسانییەکیان بۆ دەکەن.

 

چیرۆکی سەرەکی: ئەمڕۆ چوار شەممە 2-10-2024 سەرۆکوەزیران مەسرور بارزانی، كارگەی  (SMC) بۆ بەرهەمهێنانی سرنج لە شاری هەولێر كردەوە، ئەمە لەکاتێکدایە بەیانی ئەمڕۆ گەورەترین کارگەی کێبڵ و سفری لەسەر ئاستی عێراق لە هەولێر کردەوە.

لێدوانی فەرمی: سەرۆکوەزیران مەسرور بارزانی لە وتارێکدا ڕایگەیاند: "ئەم کارگەیە لەڕووی تەندروستییەوە بۆ یارمەتیدانی كەرتی پیشەسازییە بەتایبەتی كەرتی تەندروستی، ئەمە كارێكی هاوبەشە و یارمەتیدەری ئەوە دەبێت كوردستان كەمتر پێویستی بە هاوردەكردنی مەوادەكان بێت لە دەرەوە".

 

خاڵی ئەرێنی: سەرۆکوەزیران دووپاتی کردەوە کە هەوڵدەدەن زۆربەی ئەو کەرەستانە لەمەودوا هەر لە كوردستان دروست بكرێن بۆ بەرەوپێشبردنی كەرتی پیشەسازی و باشتركردنی كەرتی تەندروستی، ئەمەش دەبێتە هۆی زیاتركردنی هەلی كار، لە ئەنجامیشدا باشتركردنی ژیان و خۆشگوزەرانیی خەڵكی كوردستان و پێشخستنی كەرتی ئابووری لە هەرێمی كوردستان.

 

بابەتی ستراتیژی: جەختکردنەوە لەسەر هێزی کاری ناوخۆ تەوەرێک بوو لە گوتارەکەی سەرۆکوەزیران و گوتی: "بێگومان تاوەکو خەڵكی خۆمان بتوانێت لەم جۆرە كارگانە كار بكات، هەم داهات و دەرامەتیان باشتر دەبێت، هەم دەتوانن سوود لە ئەزموون و پسپۆڕیی بەتایبەتی ئەم جۆرە كارانە وەربگرن و توانای زانستییان لە شوێنە جیاوازەكاندا بەرفراوان بكەن".