مەسرور بارزانی: لە داهاتوویەکی زۆر نزیکدا کارەبا دەکەینە 24 کاتژمێری

ئاڤا نیوز

مەسرور بارزانی ڕایدەگەیێنێت، بەو بەرنامەیەی دەستیانپێکردووە لە داهاتوویەکی زۆر نزیکدا کارەبا لە هەرێمی کوردستان دەکەنە 24 کاتژمێری.

 

چیرۆکی سەرەکی: مەسرور بارزانی، جێگری سەرۆکی پارتی دیموکراتی کوردستان، لە چوارچێوەی هەڵمەتی بانگەشەی لیستی 190ی حیزبەکەی، لە هەولێر لەگەڵ گەنجان کۆبووەوە و گوتارێکی پێشکەش کرد. گوتارەکەی چەند تەوەرێکی جیاوازی لەخۆدەگرت، یەکێک لەوان سێکتەری خزمەتگوزارییەکان بوو.

لێدوانی فەرمی: مەسرور بارزانی جەختی لە سیاسەت و ئەجێندای پارتی کردەوە کە خزمەتکردنی خەڵکە و گوتی: "هەوڵمان داوە بە باشترین شێوە خزمەتگوزاری پێشکەش بە خەڵک بکەین، هاووڵاتی میحوەری پارتییە و لە سەردەمی بارزانی نەمرەوە پارتی خۆی بە خزمەتکاری خەڵک زانیوە، لەمەودواش هەر بەمشێوەیە دەبێت".

جێگری سەرۆکی پارتی داوای لە ئامادەبووانی ئاهەنگە و خەڵکی کوردستان کرد لەڕووی ئاوەدانییەوە تەماشای کوردستان بکەن و گوتی: "ئەو دەستکەوتانەی لە کوردستاندا هەبووە، لە هەموو شار و شارۆچکەکان بەبێ جیاوازی، پارتی پشکی شێری هەبووە، سەیری شەقامەکان و باڵەخانەکان بکەن، دەزانم هێشتا کەموکوڕی زۆرە و زۆر شت ماوە بکرێت، لە هەوڵی جددیداین پێداویستییەکان و خزمەتگوزارییەکان باشتر بکرێن، ئەجێندایەکی تێر و تەسەلمان هەبووە، بەردەوام دەبین لەسەر ئەوەی هەموو ئەو خزمەتگوزارییانەی لای ئێوە گرنگن جێبەجێیان بکەین، یەکێک لەوانە کارەبایە کە بۆ هەمووان گرنگە، بەو بەرنامەیەی دەستمانپێکردووە بەردەوامبین، لە ماوەیەکی زۆر نزیکدا کارەبای 24 کاتژمێری بۆ هەموو کوردستان دابین دەکەین". 

 
باکگراوند: کابینەی نۆیەمی حکومەتی هەرێمی کوردستان بەسەرۆکایەتیی سەرۆکوەزیران مەسرور بارزانی، ملیاران دۆلاری بۆ سێکتەری کارەبا خەرج کردووە، بەرهەمهێنانی کارەبا هەزار و 340 مێگاوات زیادی کردووە و گەیشتووەتە سێ هەزار و 817 مێگاوات، هاوکات ژێرخانی بەرهەمهێنانی کارەبا لە هەرێمی کوردستان گەیشتووەتە حەوت هەزار و 689 مێگاوات.