مەلا مستەفا بارزانی: پارتی تاكە حیزبە بەرگریی لە دەستکەوتەکانی گەلی كوردستان دەكات

ئاڤا نیوز 

 

لەچوارچێوەی بانگەشە بۆ سەرخستنی لیستی 190ی پارتی دیموكراتی كوردستان، مەلا مستەفا بارزانی لەگەڵ چین و توێژەكانی سنووری قەزای مێرگەسۆر كۆبووەوە.

 

ڕاگەیێنراوی فەرمی: بەپێی ڕاگەیێنراوێكی نووسینگەكەی، ئەمڕۆ سێشەممە، لە كۆبوونەوەكەدا مەلا مستەفا بارزانی ڕایگەیاند: دەبێت هەموومان پێکەوە کار بۆ بەهێزکردنی وڵاتەکەمان بکەین، ئەویش بە پاڵپشتیکردن و سەرخستنی لیستی 190ـی پارتی دیموکراتی کوردستان، چونکە لە ڕابردوو و ئێستا و داهاتووشدا بە ڕابەرایەتیی سەرۆک بارزانی پارتی تاکە حزبە بەرگریی لە سەروەریی نەتەوەیی و دەستکەوتەکانی گەلی كوردستان دەكات.

 

لەلایەكی دیكەوە: لە كۆبوونەوەكەدا مەلا مستەفا بارزانی، تیشكی خستە سەر پڕۆژە و كارە خزمەتگوزارییەكانی کابینەی نۆیەمی حکومەتی هەرێمی کوردستان لە سەرتاسەری هەرێمی کوردستان سەرەرای دروستکردنی چەندین کۆسپ و تەگەرە و دژایەتی.

 

مەلا مستەفا بارزانی داواشی لە هاونیشتمانیان كرد كە بە گڕوتینەوە بەشداریی لە هەڵبژاردن بکەن و دەنگ بدەن بە لیستی 190ی پارتی دیموكراتی كوردستان.

 

ئەوەی پێویستە بیزانیت: پارتی بە لیستی ژمارە 190 بەشداریی لە هەڵبژاردنی خولی شەشەمی پەرلەمانی کوردستان دەکات و 190 بەربژێریشی لە هەرچوار بازنەی هەڵبژاردن هەیە: هەولێر 64، سلێمانی 72، دهۆک 48 و هەڵەبجە 6 بەربژێر.