جێگری سەرۆکی پارتی پەیامێک ئاراستەی لایەنەکان دەکات

ئاڤا نیوز 

 

جێگری سەرۆکی پارتی پەیامێک ئاراستەی ئەو لایەنانە دەکات، کە لە بانگەشەی هەڵبژاردن پەلاماری پارتی دەدەن، دەڵێت "ئەوەندەی تێدا بهێڵنەوە بتانبوورین".

 

وێنە گەورەکە: ئەمڕۆ چوارشەممە لە چوارچێوەی هەڵمەتی بانگەشەی هەڵبژاردن بۆ لیستی 190ی پارتی، مەسرور بارزانی، جێگری سەرۆکی پارتی وتارێکی پێشکەش بە هەزاران گەنجی کوردستان کرد.

 

لێدوانی فەرمی: مەسرور بارزانی، جێگری سەرۆکی پارتی دیموکراتی کوردستان، ڕایگەیاند: " پەیامم بۆ ئەو لایەنانە هەیە کە بۆ بانگەشەی هەڵبژاردن یاخود شتی تر پەلاماری پارتی دەدەن، هەندێک هێڵ هەیە نەیبەزێنن، چونکە سبەی دێنەوە لامان و ئەوەندەی تێدا بهێڵنەوە بتانبوورین".

 

جێگری سەرۆکی پارتی ئەوەشی ڕاگەیاند: "ڕێزمان بۆ هەموو لایەنەکان هەیە، دروشمی پارتی بۆ بانگەشەی هەڵبژاردن، ئارامی و پێکەوەیی و خۆڕاگرییە و گوزارشتە بۆ دەستکەوتەکانمان لە ڕابردوودا، هەمیشەش ئەم خاکە دەپارێزین".

 

مەسرور بارزانی جەختی لە سیاسەت و ئەجێندای پارتی کردەوە کە خزمەتکردنی خەڵکە و گوتی: "هەوڵمان داوە بە باشترین شێوە خزمەتگوزاری پێشکەش بە خەڵک بکەین، هاووڵاتی میحوەری پارتییە و لە سەردەمی بارزانی نەمرەوە پارتی خۆی بە خزمەتکاری خەڵک زانیوە، لەمەودواش هەر بەمشێوەیە دەبێت".

 

جێگری سەرۆکی پارتی داوای لە ئامادەبووانی ئاهەنگە و خەڵکی کوردستان کرد لەڕووی ئاوەدانییەوە تەماشای کوردستان بکەن و گوتی: "ئەو دەستکەوتانەی لە کوردستاندا هەبووە، لە هەموو شار و شارۆچکەکان بەبێ جیاوازی، پارتی پشکی شێری هەبووە، سەیری شەقامەکان و باڵەخانەکان بکەن، دەزانم هێشتا کەموکوڕی زۆرە و زۆر شت ماوە بکرێت، لە هەوڵی جددیداین پێداویستییەکان و خزمەتگوزارییەکان باشتر بکرێن، ئەجێندایەکی تێر و تەسەلمان هەبووە، بەردەوام دەبین لەسەر ئەوەی هەموو ئەو خزمەتگوزارییانەی لای ئێوە گرنگن جێبەجێیان بکەین، یەکێک لەوانە کارەبایە کە بۆ هەمووان گرنگە، بەو بەرنامەیەی دەستمانپێکردووە بەردەوامبین، لە ماوەیەکی زۆر نزیکدا کارەبای 24 کاتژمێری بۆ هەموو کوردستان دابین دەکەین".