کچێکی دیکەی کوردی ئێزدی دوای 10 ساڵ لە ڕفاندنی ڕزگار دەکرێت

ئاڤا نیوز 

 

دەزگای هەواڵگریی عێراق ڕزگارکردنی کچێکی دیکەی کوردی ئێزدی ڕاگەیاند و ئاشکرای کرد ئێستا بۆ عێراق گەڕێنراوەتەوە.

 

وێنە گەورەکە: بەگوێرەی ئامارە فەرمییەکان، لەکۆی 6 هەزار و 417 هاونیشتیمانیی کوردی ئێزدی کە بەهۆی هێرشەکانی داعشەوە بۆ سەر شنگال و دەوروبەری ڕفێنران، تاوەکو ئێستا چارەنووسی نزیکەی  2 هەزار و 840 کەسیان نادیارە.

 

ڕاگەیێنراوی فەرمی: دەزگای هەواڵگریی عێراق بڵاوی کردەوە، دوای بەدەستگەیشتنی زانیاری لەسەر کچێکی ئێزدی کە لە چوارچێوەی هێرشی داعش بۆسەر شنگال لە ساڵی 2014 ڕفێنرابوو و لە وڵاتێکی هەرێمیدا بوو، هێزەکانیان ئەو کچەیان دۆزییەوە و ڕۆژی 2ـی ئەم مانگە بۆ بەغدا گەڕێنرایەوە، ڕێكارەکانیش بۆ ڕادەستکردنەوەی بە کەسوکارەکەی دەستیانپێکردووە.

 

زانیاریی زیاتر: ئەو کچە ناوی فەوزییە ئەمین سیدۆیە و پڕۆسەی گەڕاندنەوەشی بە بڕیاری فەرماندەی گشتیی هێزە چەکدارەکان و بە هاوکاریی وەزارەتی دەرەوە و بەڕێوەبەرایەتیی گشتیی ڕزگاربووانی ئێزدی بووە، دەزگای هەواڵگری جەختیش دەکاتەوە کە بەردەوام دەبێت لە هەوڵەکانی بۆ گەڕاندنەوە و ئاشکراکردنی چارەنووسی سەرجەم بێسەروشوێنبووانی ئێزدی.