دانیشتووانی گەڕەکێکی کەلار داوای بەلەم لە یەکێتی دەکەن

ئاڤا نیوز

 

بەشێک لە دانیشتووانی گەڕەکێکی کەلار لە هەڵمەتی هەڵبژاردندا بە تەنزەوە داوای خزمەتگوزاری لە بەربژێر و لایەنەکان دەکەن.

وێنە گەورەکە: لە سەرجەم هەڵبژاردنەکاندا کاتێک بانگەشە دەستپێدەکات، هاووڵاتیان بەشێوەی جیاواز داوای خزمەتگوزاری دەکەن و هیوایان هەیە پێش دەنگدان بەشێک لە داواکارییەکانیان جێبەجێ بکرێن.

چیرۆکی سەرەکی: قەزای کەلار ناوەندی ئیدارەی سەربەخۆی گەرمیانە و لەلایەن یەکێتییەوە بەڕێوەدەبرێت، یەکێک لە گەڕەکە گەورەکانی ناوی فەرمانبەرانە  و کێشەی سەرەکی خراپی شەقامەکانیەتی، دانیشتووانەکەشی لەڕێگەی لافیتە و نووسینی تەنزئامێزەوە داوای چاککردنی دەکەن.

ئەوەی پێویستە بیزانیت: چەند لافیتەیەک لە گەڕەکەکە هەڵواسراون، بۆ ئەوەی هەر بەربژێر و بەرپرسێک چووە گەڕەکەکە، پێش ئەوەی داوای دەنگیان لێبکات، بە گلەیی و گازاندە و داواکارییەکانیان ئاشنابێت. یەکێک لە لافیتەکان ڕەنگی سپییە و لەسەری نووسراوە؛ "وا زستان دێت و دووبارە شەقامەکان دەبن بە پۆند و گۆماو، بەلەممان بۆ دابین بکەن با دەنگتان پێبدەین".

 

بۆچوونی بەرامبەر: ئەکرەم ساڵح، سەرۆکی شارەوانی کەلار لەمبارەیەوە بە ئاڤا نیوزی گوت: "زیاتر لە ساڵێکە تەندەرمان بۆ شەقامەکە کردووە، بەڵام هیچ بەڵێندەرێک ئامادەنەبووە وەریبگرێت، بۆیە هەفتەی داهاتوو خۆمان دەست بە چاککردنی شەقامەکە دەکەین و فەرمانی کارگێڕییەکەی تەواو کراوە".

ئەمەش بزانە: لەبەر نزیکی گەڕەکی فەرمانبەران لە ناوەندی بازاڕەوە، سەرۆکایەتیی شارەوانی کەلار لەبری قیڕ و کۆنکرێت، هاوشێوەی بازاڕ شەقامەکە خشتڕێژ دەکات.