ئاڤا چیرۆکی "دڵتەزێنی" ڕزگارکردنی کچێکی کوردی ئێزدی لە غەززە دەگێڕێتەوە

ئاڤا نیوز

 

دوای یازدە ساڵ کچێکی کوردی ئێزدی لەلایەن دەزگای هەواڵگری چوار وڵاتەوە لە  غەززە ڕزگار کرا.

 

چیرۆکی سەرەکی: کاتێک چەکدارانی داعش هێرشیان کردە سەر شنگال، کچی ئێزدیی لەلایەن چەکدارێکەوە دەڕفێنرێت و دواتر لە خۆی مارە دەکات و دوای چەند ساڵێک چەکدارەکە دەکوژرێت، دایکی ئەو چەکدارە 'خەسووی کچەکە' دەیگوازێتەوە بۆ غەززە و لە کوڕێکی تری خۆی مارە دەکات؛ هەواڵگریی ئەمریکا، ئیسرائیل، بە هاوکاری ئوردن، کچەکە دەدۆزنەوە و ڕزگاری دەکەن.

 

ڕاگه‌یێنراوی فه‌رمی: سوپای ئیسرائیل ڕایگەیاند: "دوای زیاتر لە 10 ساڵ کچە ئێزیدییەکە لە ئۆپەراسیۆنێکی تایبەتدا لەژێر دەستی چەکدارانی حەماسدا ڕزگارمان کرد و ڕادەستی عێراقمان کردەوە".

 

بۆچوونی لایەنی بەرامبەر: وەزارەتی دەرەوەی عێراق لەوبارەیەوە دەڵێت: دەزگای هەواڵگریی نیشتمانیی عێراق و هەردوو باڵیۆزخانەی ئەمریکا لە بەغدا و عەممان و بە هاوکاریی دەسەڵاتدارانی ئوردن، ئەو کچە ئێزیدییە ڕزگار کرا.

 

زانیاریی بەدەستهاتوو: فەوزییە ئەمین سیدۆ، کچە کوردە ئێزدییەکە کاتێک ڕفێنراوە تەمەنی 11 ساڵ بووە، ''بــەزۆر'' دووجار دراوە بە شوو، لە تەمەنی 21 ساڵیدا و دوای 10 ساڵ لەژێر دەستەیی، لەلایەن دەزگای هەواڵگریی چوار وڵاتەوە توانرا ڕزگار بکرێت و ئێستا لەنێو کەسوکاری خۆیەتی لە شنگال.