لە کابینەی نۆیەم دوو هەزار و 552 پرۆژە لە بواری ڕێگاوبان جێبەجێکراون

ئاڤا نیوز 

 

کابینەی نۆیەم کابینەی چاکسازی و خزمەتگوزاری و خزمەتی هاووڵاتیان، ڕێگای تەخت و پان و بەرین و کوالێتی بەرز و بێ گرفت، هێمان بۆ ناسینەوەی ئەم کابینەیە.

 

وێنە گەورەکە: سەرەڕای هەموو ئاستەنگە داراییەکان و ڕێگرییەکان لە ماوەی تەمەنی کابینەی نۆیەمدا، سەدان پڕۆژەی خزمەتگوزاری نوێ دروستکراون و تەواوکراون، ئەم هەنگاوە گرنگ و ستراتیژییەی لە چوارچێوەی چەند شارێکدا نەبوو، بەڵکو دەستی ئاوەدانی گەیشتووەتە سەدان گوند و بەستراونەتەوە بە شارەکان. 

 

لێدوانی فەرمی: د.ئاگرین عەبدوڵڵا، بریکاری وەزارەتی ئاوەدانکردنەوە، سەبارەت بە پڕۆژە ستراتیژییەکانی ڕێگاوبان بۆ ئاڤا نیوز دەڵێت: لە کابینەی نۆیەمدا چەندین پڕۆژەی ڕێگاوبانی نێودەوڵەتیی بە ستانداردی جیهانی و کوالێتی بەرز تەواو کراون، بەبێ جیاوازی لە زاخۆوە تاوەکو گەرمیان.

 

زانیاریی زیاتر: ئێستا چەندین پڕۆژەی گرنگ و ستراتیژی لە تەواوی شارەکانی هەرێمی کوردستان لە قۆناغی جێبەجێکردن و تەواوکردندا، هاوکات سەرۆکوەزیران مەسرور بارزانی لەگەڵ لێدانی زەنگی ساڵی نوێی خوێندن لە شاری کۆیە، موژدەی بە دوو سایدی کردنی ڕێگای، هەولێر - کۆیەی بە دانیشتووانی ئەو شارەدا.

 

ژمارەکان وادەڵێن: لە کابینەی نۆیەمدا، بۆ ڕێگاوبانی دەرەوەی شارەکان 585 پڕۆژەی جیاواز جێبەجێکراون بەکۆی گشتی هەزار و 363 کیلۆمەتر ڕێگای نوێیە، کە گوژمەی تێچوویان 930 ملیار دینارە. هەروەها بۆ ژێرخانی دروستکردنی ڕێگای ناوەوەی شارەکان کابینەی نۆیەم هەزار و 967 پڕۆژەی جیاواز جێبەجێکراون، کە گوژمەی تێچوویان یەک ترلیۆن و 863 ملیار دینار بووە.