مەسرور بارزانی هۆکاری کەمبوونەوەی بەرهەمی نەوتی کوردستان ئاشکرا دەکات

ئاڤا نیوز

سەرۆکوەزیران،  مەسرور بارزانی، لە کۆڕبەندی مێپس ڕایگەیاند، بڕیارێکی سیاسی لە بەغدا و هێرشە درۆنییەكان دوو هۆکاری سەرەکی بوون بۆ كەمبوونەوەی بەرهەمهێنانی نەوت لە هەرێمی کوردستان. لە نۆ كێڵگە، پێنج دانەیان بە تەواوی ڕاگیراون.

چیرۆکی سەرەکی:  بەئامادەبوونی سەرۆک بارزانی و سەرۆکوەزیران مەسروور بارزانی و 150 سەرکردەی ناوخۆیی، هەرێمی و نێودەوڵەتی لە 25 وڵاتی جیاواز، بۆ ماوەی سێ ڕۆژ لە دهۆک کۆڕبەندی ئاشتی و ئاسایشی ڕۆژهەڵاتی ناوەڕاست (MEPS 2025)، بەڕێوەچوو، تێیدا سەرۆکی حکومەتی هەرێـمی کوردستان دیدارێکی تایبەتی هەبوو.

لێدوانی فەرمی: سەرۆکوەزیران مەسرور بارزانی، لە دیدارە تایبەتەکەیدا ڕایگەیاند: لە بەغدا بڕیارێكی سیاسی درا بۆ ڕاگرتنی هەناردەی نەوتی کوردستان، هەندێك لەو كۆمپانیایانە كە خۆیان بەرهەمیان زۆر نەبوو، گەیشتنە قۆناغێك ناكرێت چیدیکە نەوت بەرهەم بهێنن، چونكە تێچووەكەی ئەوەندە زۆر بوو نەیاندەتوانی بەردەوام بن، بیرە نەوتەكانیان راگرت، لە نۆ كێڵگە، پێنج دانەیان بە تەواوی راگیراون.

زانیاریی زیاتر: سەرۆکی حکومەتی هەرێـمی کوردستان، گوتیشی، هۆكارێكی دیكەی کەمبوونەوەی ئاستی بەرهەمهێنانی نەوت، بابەتی هێرشە درۆنییەكان بوون كە كرانە سەر چەند كێڵگەیەكی نەوت، بەداخەوە دەزانین ئەو كەسانە كێن كە هێرشیان كرد، دەزانین چ گرووپێكن، هەموو لایەك دەزانن و ئێمە لەگەڵ حكومەتی بەغدا قسەمان كرد، هەندێك لەوانە دەستگیر كران، بەڵام دواتر هیچ نەكرا و سزا نەدران و ئەو سزایەی كە شایانیان بوو نەدران.

گوتیشی، هیوادارم گەیشتبینە ئاستێك بەغدا تێبگات كە ئەم هێرشانە دووبارە نەبنەوە و كۆمەڵگەی نێودەوڵەتی رێگە نەدەن بەم هێرشە بێبنەما و تیرۆریستییانە، کە ژێرخانی مەدەنی دەکەن ئامانج.

سێ جار دادگا بڕیاری دا و گوتی كوردستان لەسەر حەقە و گرێبەستەكان یاسایی و تەواون، تاوەكو كوردستان ئەم گرێبەستانەی هەبێت، كوردستان بڕیار دەدات بەرهەمی گاز و نەوت چی لێ بكات و چۆن مامەڵەی پێوە بكات.