هەفتەی داهاتوو ئاهەنگی دەرچووانی زانکۆی سەڵاحەددین دەکرێت

ئاڤا نیوز

وا بڕیارە یەکشەممەی داهاتوو، 23-11-2025، بە ئامادەبوونی سەرۆکوەزیران، مەسرور بارزانی، ئاهەنگی خولی 44ـەمینی دەرچووانی زانکۆی سەڵاحەدین بەڕێوەبچێت.

چیرۆکی سەرەکی: وابڕیاربوو ئەمساڵ لە 9-11-2025، ئاهەنگی دەرچووانی زانکۆی سەڵاحەددین بەڕێوەبچێت، بەڵام بەهۆی هەڵبژاردنی خولی شەشەمی پەرلەمانی عێراق، ئاهەنگەکە بۆ 16-11-2025 دواخرا، لەو بەروارەش بەهۆی نالەباری کەشوهەوا، بۆ جاری دووەمیش دواخرا.

لێدوانی فەرمی: سامان عەبدوڵڵا، بەڕێوەبەری ڕاگەیاندنی زانکۆی سەڵاحەددین، بە ئاڤای گوت:ڕۆژی یەکشەممەی داهاتوو 23ـی ئەم مانگە، بە ئامادەبوونی سەرۆکوەزیران، مەسرور بارزانی، ئاهەنگی دەرچووانی خولی 44ـەمینی دەرچووانی زانکۆی سەڵاحەدین، بۆ هەردوو خولی یەکەم و دووەم بۆ ساڵی دەرچوونی 2024 - 2025ـی زانکۆی سەڵاحەددین بەڕێوەدەچێت.

زانیاریی زیاتر: لە خولی 44ـەمینی دەرچووانی زانکۆی سەڵاحەدین، هەزار و 950 دەرچووی خوێندنی باڵا (دیپلۆمی باڵا، ماستەر، دکتۆرا) و پێنج هەزار و 32 دەرچووی بەکالۆریۆس بڕوانامەیان پێدەدرێت.

ئەوەی پێویستە بیزانیت: ئاهەنگەکە کاتژمێر چواری ئێوارە لە یاریگای نێودەوڵەتی فرەنسۆ هەریری بەڕیوەدەچێت.

ئەمەش بزانە: زانکۆی سەڵاحەددین، یەکێکە لە زانکۆ حکومییەکانی هەرێمی کوردستان، ساڵی 1968 لە سلێمانی دامەزراوە و ساڵی 1981 بۆ هەولێر گواستراوەتەوە، ئەم زانکۆیە ئێستا 17 کۆلێژ و 90 بەشی ئەکادیمی لەخۆدەگرێت.