سەرۆکوەزیران بارزانی: نامانەوێت هەرێمی کوردستان تێکەڵی هیچ شەڕێک ببێت

ئاڤا نیوز

 

سەرۆکوەزیران مەسرور بارزانی ڕایدەگەیێنێت، نایانەوێت بە هیچ جۆرێک هەرێمی کوردستان تێکەڵی هیچ جۆرە شەڕێک ببێت و پێیانوانییە شەڕ هۆکارێک بێت بۆ چارەسەرکردنی هیچ کێشەیەک لە ڕۆژهەڵاتی ناوەڕاست و دونیادا.

 

وێنە گەورەکە: بەهۆی پەرەسەندنی شەڕی ئیسرائیل لەگەڵ بزووتنەوەی حەماس و حیزبوڵڵای لوبنان و تێوەگلانی ئێران بەشێوەیەکی ڕاستەوخۆ لە ئاڵۆزییەکان، مەترسی هەیە ئاگری شەڕەکە بگاتە وڵاتانی دیکەش بەتایبەت عێراق، ئەمەش نیگەرانی دروستکردووە.

 

لێدوانی فەرمی: سەرۆکوەزیران مەسرور بارزانی لە چاوپێکەوتنێکی تایبەتدا لەگەڵ ئاڤا میدیا دەڵێت: "سەقامگیری هەمیشە لە بابەتە هەرە سەرەکییەکانە بۆ ئێمە بۆ ئێستا و داهاتووش. ئامادە نین سەقامگیری و ئاسایشی هەرێمی کوردستان بکەینە قوربانی هیچ بابەتێکی دیکە".

بابەتی ستراتیژی: پەیوەست بە دۆخی ڕۆژهەڵاتی ناوەڕاست کە مەترسی هەیە شەڕێكی هەرێمی گەورە هەڵبگیرسێت، چۆن هەرێمی کوردستان لەو مەترسییە دەپارێزرێت؟  سەرۆکوەزیران بارزانی دەڵێت: "ئێمە نامانەوێت بە هیچ جۆرێک هەرێمی کوردستان تێکەڵی هیچ جۆرە شەڕێک ببێت. پێمانوانییە شەڕ هۆکارێک بێت بۆ چارەسەرکردنی هیچ کێشەیەک لە ڕۆژهەڵاتی ناوەڕاست یان لە هیچ شوێنێکی دیکەی دونیادا هەبێت". 

 

کاریگەری و لێکەوتەکان: بە دیدگای مەسرور بارزانی شەڕ چارەسەر نییە، وڵاتان لایەنەکان شەڕ دەکەن دوایی دەبێت ئاشت ببنەوە و بە گفتوگۆ چارەسەری کێشەکانی خۆیان بکەن، جا بۆ هەر لە سەرتاوە گفتوگۆ نەبێت بە بنەمای چارەسەری گرفتەکان. دەشڵێت: "ئێمە لە هەرێمی کوردستان بڕوایەکی پتەومان بەوە هەیە کە کوردستان تێکەڵی هیچ کێشەیەکی ناوچەیی نەبێت و هەوڵی ئەوە بدەین کوردستان پارێزراو بێت، نەبین بەسەرچاوەی گرژی و مەترسی بۆ سەر هیچ لایەنێک و ناشمانەوێت هیچ کەسێک ببێت بە مەترسی بۆسەر بەرژەوەندیی هەرێمی کوردستان".