میدیای ئیسرائیل: ئیسرائیل بەنیازە هێرش بکاتە سەر عێراق

ئاڤا نیوز

 

ئیسرائیل بەنیازە هەنگاو دژ بە گرووپە چەکدارەکان لە عێراق بنێت، ئەمەش دوای کوژرانی دوو سەربازیان بەهۆی هێرشی درۆنی گرووپە چەکدارەکانی عێراق لە بەرزاییەکانی جۆلان.

 

وێنە گەورەکە: بەرەی مقاوەمەی ئیسلامی لە عێراق لە ماوەی ڕابردوودا چەندین جار لە ڕێگەی هەڵدانی مووشەک و درۆنی بۆمبڕێژکراوەوە هێرشی کردووەتە سەر پێگەکانی ئیسرائیل و لە دوایین هێرشدا بۆسەر بەرزاییەکانی جۆلان دوو سەربازی ئیسرائیلی کوژران و 23ی دیکە برینداربوون.

 

بڵاوکراوەی فەرمی: ماڵپەڕی "وای نێت"ـی ئیسرائیلی لەسەر زاری دوو بەرپرسی ئیسرائیلیەوە دەڵێت: "ئیسرائیل پلانی هەیە وەڵامێکی تووندی ئێران بداتەوە، هاوکات دوای کوژرانی ئەو دوو سەربازە، ئیسرائیل بەنیازە لە عێراقیش دژی میلیشیاکان هەنگاو بنێت و ڕێوشوێنی گونجاو دەدۆزینەوە بۆ ئەوەی لە عێراق بیگرینە بەر".

 

لەلایەکی دیکە: ڕۆژنامەی "یەدیعوت ئەحرۆنۆت" لە زاری چەند سەرچاوەیەکەوە ئەوەی ئاشکرا کردووە: "ئیسرائیل بەنیازە هەنگاو دژ بە گرووپە چەکدارەکان لە عێراق بنێت".

 

ئەوەی پێویستە بیزانیت: یەکەمجارە هێرشی گرووپە چەکدارەکانی عێراق ببێتە هۆی کوژران و برینداربوونی سەربازانی ئیسرائیلی، کاتێک بەهۆی مووشەکێکی حوسییەکانەوە کە لە یەمەن ئاراستەی ئیسرائیل کرا و بووە هۆی کوژرانی سەربازێکیان، ئیسرائیل بەندەری حودەیدەی یەمەنی بۆردوومان کرد.