سوودانی سنوورەکانی عێراق و سووریا بەسەردەکاتەوە: هێزەکانمان لە ئامادەباشیدان

ئاڤا نیوز

 

ئەمڕۆ چوارشەممە محەممەد شیاع سوودانی، فەرماندەی گشتیی هێزە چەکدارەکان ناوچەی قائیم-ی لەسەر سنووری عێراق و سووریا بۆ هەڵسەنگاندنی دۆخی ئەمنی و ئامادەیی هێزەکان بەسەرکردەوە.

 

وێنە گەورەکە: دوای هێرشی سوپای عەرەبی سووریا بۆ سەر ناوچەکانی ژێردەسەڵاتی هەسەدە و ئازادبوونی سەدان چەکداری داعش لە زیندانەکان، حکومەتی عێراق دەیەوێت دڵنیابێتەوە کە ئەو هێزانەی ئەرکی پاراستنی سنووریان لە ئەستۆیە، لە بەرزترین ئاستی ئامادەباشیدان بۆ مامەڵەکردن لەگەڵ هەر ئەگەرێکی ئەمنی لە ناوچەکەدا.

 

- سنووری عێراق (ناوچەی قائیم، هێڵی سنووریی پارێزگاکانی ئەنبار و نەینەوا) و سووریا هەمیشە خاڵێکی هەستیاری ئەمنی بووە. سەردانەکەی سوودانی بە یاوەریی باڵاترین فەرماندە سەربازییەکان، دڵنابوونەیەوەیە لە کۆنتڕۆڵکردنی تەواوەتی سنوورەکان و ڕێگریکردن لە هەر مەترسییەک کە ڕەنگە لە دیوی سووریاوە دزە بکات.

 

ڕاگەیێنراوی فەرمی: بەگوێرەی ڕاگەیێنراوی نووسینگەی سەرۆکوەزیرانی عێراق، سودانی لە بارەگای فیرقەی حەوت کۆبوونەوەیەکی ئەمنی ئەنجام دا بە ئامادەبوونی وەزیری ناوخۆ، سەرۆکی ئەرکانی سوپا، جێگری فەرماندەی ئۆپەراسیۆنە هاوبەشەکان و فەرماندەی هێزە زەمینی و ئاسمانی و پاسەوانی سنوور.

 

-  گفتوگۆ کرا لەسەر ئاستەنگە ئەمنییەکان و ئەو ڕێکارانەی گیراونەتەبەر بۆ "قەڵغانی سنوور".

 

- سوودانی دوای گوێگرتن لە ڕاپۆرتی فەرماندەکان؛ متمانەی تەواوی بە توانای هێزەکان نیشان دا بۆ ڕووبەڕووبوونەوەی هەر هەڕەشەیەک. سوودانی ڕایگەیاند: سەرکەوتن و دەستکەوتە ئەمنییەکانی ئەم هێزانە کۆڵەکەی سەرەکیی سەقامگیریی عێراقن.