پەیامی نوێ لە مەسرور بارزانییەوە: پارتی بێ ڕکابەرە

 

ئاڤا نیوز 

مەسرور بارزانی، جێگری سەرۆکی پارتی لە دهۆکەوە چەند پەیامێکی نوێی لەبارەی هەڵبژاردن ئاراستەی لایەنگرانی حیزبەکەی، خەڵکی کوردستان و لایەنە سیاسییەکان کرد و جەختی کردەوە، هیچ حیزبێک لە بەرنامە و خزمەتگوزاری ناتوانێت ڕکابەری پارتی بێت، هیچ لایەنێک لە ئاستی پارتی نەیتوانیوە بەرنامەکەی وا دابڕێژێت کێبڕکێ لەگەڵ پارتی بکات و، پارتی هەر دروشمێک هەڵبگرێت جێبەجێی دەکات.

 

چیرۆکی سەرەکی: مەسرور بارزانی، جێگری سەرۆكی پارتی دیموكراتی كوردستان، ئەمڕۆ شەممە لەگەڵ پیشەوەر و بازرگان و كاسبكارانی پارێزگای دهۆك كۆبووەوە و  48 كاندیدی پارتی لە سنووری بازنەی دهۆك بەفەرمی ناسێنران.

لێدوانی فەرمی: لە سەرەتای قسەکانیدا مەسرور بارزانی ئاماژەی بە گرنگیی هەڵبژاردنی ئەمجارە کرد و ڕایگەیاند: "بە دەنگی خۆتان چارەنووسی وڵاتەكەمان دیاری بكەن و دەنگ بدەنە لیستی پارتی، هەڵبژاردن هەموو كات چارەنووسسازە بۆ هەر كۆمەڵگەیەك، بەڵام ئەمجارە هەم كات هەم ئەنجامی ئەم هەڵبژاردنە بۆ داهاتووی وڵاتەكەمان زۆر گرنگە".

مەسرور بارزانی ڕووی قسەی ئاراستەی سەرجەم خەڵکی کوردستان کرد و گوتی: "زۆر گرنگە هەمووان بچن دەنگ بدەن، ئەوەی دەنگ نەدات دڵنیابن خەڵكێك لەبری ئێوە دەنگ دەدەدات، ئەگەر حەز دەكەن ئەنجامی هەڵبژاردن بەدڵی ئێوە بێت بڕۆن دەنگ بدەن، تەنانەت كەسوكار و دراوسێكانیشتان هان بدەن".

جێگری سەرۆکی پارتی ئاماژەی بەوە کرد پارتی وەك حیزبێكی كوردستانی، هەر كەسێك لە هەر ئایین و نەتەوەیەك بێت لە كوردستان جێی لەنێو پارتی دەبێتەوە، پارتی هەمیشە چەتر بووە بۆ كۆكردنەوەی هەموو دەنگەكانی كوردستان،  لەکاتێکدا لایەنی دیکە هەبووە شانازی بەوە دەکەن یەکڕیزی پێکهاتەکان تێکبدەن. جەختیشی کردەوە کە پارتی بەرگری لە هەموو پێکهاتەکان دەکات بەبێ جیاوازی.

لەلایەکی دیکەوە: مەسرور بارزانی ئاماژەی بە دروشمی تووندی لایەنەکان کرد و گوتی: "چ لایەنێک خۆی پێ لە پارتی باشترە، با یەک دەستکەوتی خۆیانمان نیشان بدەن بێ پارتی، تەنیا ئەوکاتە دەستکەوتیان هەبووە کاتێک لەگەڵ پارتی بوونە، پارتی نەبووایە ئەو دەستکەوتەشیان نەدەبوو. هەر شوێنێک پارتی لێ بێت ئارامی و ئاوەدانی لێ بووە، هەر کەسێک نیەتی تێکدانی ئەو دۆخەی هەبێت ناتوانێت. نامانەوێت تێکەڵی ئەو گرفتانە بین کە لە ڕۆژهەڵاتی ناوەڕاست ڕوودەدەن، ئێمە بە تەنیا ئەو قەوارەیەمان پاراست، تەنیا پارتی باسی ئارامی و خۆڕاگری دەکات ئەوانی دیکە هەمووی باسی تێکدان دەکەن".