مەسرور بارزانی: وڵات تەنیا بە قسە و بەڵێن بەڕێوەناچێت

ئاڤا نیوز

مەسرور بارزانی، جێگری سەرۆکی پارتی لە میانەی کۆبوونەوەی لەگەڵ ژمارەیەک لە مامۆستای زانکۆ لە دهۆک، چەند پەیامێکی نوێی حیزبەکەی لەبارەی هەڵبژاردن ئاراستەی لایەنگران و خەڵکی کوردستان و لایەنە سیاسییەکان کرد و جەختی کردەوە، پارتی هیچ کاتێک هێندەی ئەمڕۆ بەهێز نەبووە.

 

چیرۆکی سەرەکی: مەسرور بارزانی، جێگری سەرۆكی پارتی دیموكراتی كوردستان، ئەمڕۆ یەکشەممە لەگەڵ ژمارەیەک مامۆستای زانکۆ لە پارێزگای دهۆک كۆبووەوە و پەیامی پارتی و پڕۆژە و دەستکەوتی ئەو حیزبەی پێ ڕاگەیاند. 

 

لێدوانی فەرمی: مەسرور بارزانی، جێگری سەرۆکی پارتی ڕایگەیاند: مامۆستایان ئەرکێکی پیرۆزیان لە ئەستۆیە و پێویستە ڕێنمایی بە قوتابیان و خەڵک بدەن، تا بچنە سەر سندوقەکانی دەنگدان و بڕیار بۆ چوار ساڵی ئایندە بدەن، بڕیارەکە چارەنووسسازە و دەبێت بەهەند وەریبگرن.

 

جێگری سەرۆکی پارتی، گوتی: هەڵبژاردنی پەرلەمانی کوردستان لە کاتێکدایە کە گۆڕانکاری خێرا لە ناوچەکە ڕوودەدات، بۆیە پێویستە بڕیاری حەکیمانە بدەین، وڵات بە بەڵێن و قسەکردن بەڕێوەناچێت، پێویستە خوێندنەوەیەکی دروست بۆ هەر لایەنێک بکرێت و بزانرێت تا چەند لە ئاستی سەرکردایەتیکردن و قوربانیدانن بۆ خەڵک، نەک خەڵک بەقوربانی خۆیان بکەن.