مەسرور بارزانی: پارتی بەهێز و یەکڕیزە و لەم هەڵبژاردنە یەکەم دەبێت

ئاڤا نیوز

 

مەسرور بارزانی ڕایدەگەیێنێ، ئەم هەڵبژاردنە چارەنووسی کوردستانی لەسەر بەندە و  پارتی سەرکەوتن بەدەست دەهێنێت،  پارتی لە هەڵبژاردنی ئەمجارە یەکەم دەبێت و لەژێر سەرپەرشتیی سەرۆک بارزانی هەر یەکەم دەبێت.

چیرۆکی سەرەکی: مەسرور بارزانی، جێگری سەرۆکی پارتی دیموکراتی کوردستان لەمیانەی بانگەشەی هەڵبژاردن بۆ لیستی 190ی حیزبەکەی لە شاری دهۆک لەگەڵ ئافرەتان و قوتابیان و لاوان کۆبووەوە و گوتارێکی پێشکەش کرد.

لێدوانی فەرمی: مەسرور بارزانی لە سەرەتای قسەکانیدا جارێکی دیکە دووپاتی لە گرنگی ئەم هەڵبژاردنە کردەوە و گوتی: "ناحەزان ڕێگری لە پارتی دەکەن، بەڵام پارتی بەهێز و یەکڕیزە و لە بەهێزیشەوە داوای ئاشتی دەکات، بەڵام هەندێک لایەن بۆ بەرژوەندیی خۆیان نایانەوێت کوردستان بەهێز و یەکڕیز بێت". 

جەختیشی کردەوە "ناحەزانی پارتی هیچ کاتێک وەکو ئێستا لاواز و دەستکورت نەبوون،  بەڵام دیسان دەستی برایەتییان بۆ درێژ دەکەین، لەکاتێکدا داوای ئاشتی دەکەین کە لە هەرێمی کوردستان لە هەمووان بەهێزترین و هەرگیز وەکو ئێستا بەهێز نەبووین، ئامانجی پارتی ئەوەیە سەرجەم لایەن و هاووڵاتیانی کوردستان سەربەرز و سەربڵند بن".

لەلایەکی دیکەوە: جێگری سەرۆکی پارتی ئاماژەی بە دروشم و گوتاری لایەنەکان کرد و گوتی: "ئەوانەی زیادەڕۆیی دەکەن پێیان دەڵێین ناتوانن، ناتوانن، ناتوانن. ئاماژەی بۆ ئەوەش کرد ئەو حیزبەی وەفای بۆ تێکۆشەرانی و قوربانیدەرانی نەبێت، چۆن وەفای بۆ خەڵک دەبێت".

 

مەسرور بارزانی دووپاتی کردەوە پارتی "بۆ ڕزگارکردنی خاکی کوردستان دامەزراوە و دەمانەوێت وەکو هەموو گەلانی جیهان بگەینە هەموو مافەکانمان". جەختیشی کردەوە: "شکست بە پلانی شکاندنی پارتی هێنراوە، لە مێژوو فێر ببن؛ دڵنیابن لەوەی پارتی ڕۆژ بە ڕۆژ بەهێزتر دەبێت، چونکە خوا و خەڵکی کوردستان پشتیوانی پارتییە".