مەسرور بارزانی: لە 20ی ئۆکتۆبەر لووتی ناحەزان دەشکێنین

ئاڤا نیوز

 

مەسرور بارزانی لە گوتارێکدا لە شاری دهۆک خیانەتی 16ی ئۆکتۆبەری 2017ی بەشێک لە یەکێتی و دواتر داستانی پردێی بیری هەمووان هێنایەوە و گوتی: "ئەوکات چۆن لووتی ناحەزانمان شکاند، ئەمجارەش لە 20ی ئۆکتۆبەر لووتی دەشکێنینەوە".

 

چیرۆکی سەرەکی: مەسرور بارزانی، جێگری سەرۆکی پارتی لەمیانی بەشداریکردنی لە کۆبوونەوەیەکی جەماوەری لیستی 190ی حیزبەکەی لە شاری دهۆک گوتارێکی پێشکەش کرد و باسی لەوە کرد کە چەند ڕۆژێکی تر ساڵیادی 16ی ئۆکتۆبەرە و ئەو ڕۆژەی بە "گەورەترین خیانەتی سەردەم" لە کوردستان وەسف کرد.

لێدوانی فەرمی: مەسرور بارزانی گوتی: "ئەوکات خەڵكێک بە شانازییەوە باسیان دەکرد کە بەشێک بوون لە پلانی جێبەجێکردنی 16ی ئۆکتۆبەر، ئەمڕۆ لە شەرمان بە جۆرێکی تر ئەو چیرۆکە دەگێڕنەوە، قارەمانانی پارتی و کوردستان چۆن ڕۆژی 20ی ئۆکتۆبەر لە پردی لووتی ناحەزانیان شکاند،  ئەمجارەش لە 20ی ئۆکتۆبەر لووتی هەموو ناحەزانی پارتی دەشکێنێت".

 

باکگراوند: ڕۆژی 16ی ئۆکتۆبەری 2017، واتە 21 ڕۆژ دوای ریفراندۆمی گەلی کوردستان بۆ سەربەخۆیی، بەشێک لە هێزی پێشمەرگە بە بڕیاری بەشێک لە یەکێتی لە سەنگەرەکانی بەرگری کشانەوە و ڕێگەیان بۆ حەشدی شەعبی و سوپای عێراق کردەوە، بەمەش کورد کەرکووکی لەدەست دا، بەرەی ریفراندۆم ئەوکات پاشەکشەکەیان بە "ڕێککەوتنی پێشوەختە و خیانەت" وەسف کرد.

هێرشی حەشدی شەعبی بە چەکی پێشکەوتوو و پاڵپشتی سوپای وڵاتێکی دراوسێ بۆ سەر هەرێمی کوردستان بەردەوام بوو تاوەکو گەیشتە پردێ، بەڵام لەوێ هێزی پێشمەرگە بەرگرییەکی تووندی کرد و هێرشی حەشدی وەستاند.