عەلی باپیر: یەکێتی خۆی لەبیرچووەتەوە و دەیەوێت خەڵک بەلاڕێدا ببات

ئاڤا نیوز 

 

سەرۆکی کۆمەڵی دادگەری لەمیانی بانگەشەی حیزبەکەی بۆ هەڵبژاردنی  پەرلەمانی کوردستان، هێرشی تووند دەکاتە سەر یەکێتی و دەڵێت "دەیەوێت خەڵک بەلاڕێدا ببات و لەبیری چووەتەوە بە درێژای ساڵانی ڕابردوو لە حکومەتدا بووە".

 

وێنە گەورەکە: یەکێتیی نیشتمانیی کوردستان بە دروشمی "کۆتایی پێدەهێنین و دەیڕوخێنین " زمانێکی تووند بۆ بانگەشە بەکاردەهێنێت، ئەمەش ڕووبەڕووی ڕەخنەیەکی زۆری کردووەتەوە، بەتایبەت کە لە هەموو کابینەکانی حکومەت لە ساڵی 1992ەوە تاوەکو ئێستا پێکهێنەرێکی سەرەکی حکومەت بووە.

 

لێدوانی فەرمی: عەلی باپیر، سەرۆکی کۆمەڵی دادگەری دەڵێت: "یەکێتی لەبیری چووەتەوە بەدرێژایی ساڵانی ڕابردوو تاوەکو ئێستا لە حکومەتدا بووە، ئێستا خۆی لێ بووە بە ئۆپۆزیسیۆن".

 

سەرۆکی کۆمەڵی دادگەری پەندێکی پێشینان بۆ دروشمەکانی یەکێتی دەهێنێتەوە و دەڵێت: "لەگەڵ گورگ گۆشت دەخوات و لەگەڵ مەڕ شین دەکات".