نێچیرڤان بارزانی وەڵامی سەرۆکی یەکێتی و دروشمەکەی دەداتەوە

ئاڤا نیوز

 

نێچیرڤان بارزانی، جێگری سەرۆکی پارتی وەڵامی بافڵ تاڵەبانی، سەرۆکی یەکێتی و دروشمەکەی دەداتەوە و دەڵێت: "ئەوانە هیچیان پێنییە، کوردستان بە هاتوهاواری بانگەشەی هەڵبژاردن ناڕووخێت". داواش دەکات خەڵکی کوردستان دەنگ بە لیستی 190ی پارتی بدەن بۆ ئاوەدانی نەک بۆ تێکدان و ڕووخاندن.

 

وێنە گەورەکە: هەڵمەتی ئەمجارەی بانگەشەی هەڵبژاردن جیاوازە و جگە لە پارتی، لایەنەکانی دیکە زمانی زبر بەکاردێنن، بەتایبەت یەکێتیی نیشتمانیی کوردستان دروشمی تووندی هەڵگرتووە، وەکو "کۆتایی پێدەهێنین و دەیڕووخێنین".

لێدوانی فەرمی: نێچیرڤان بارزانی لە کەرنەڤاڵێکی بانگەشەی لیستی پارتی لە هەولێر وەڵامی یەکێتی دایەوە و داوای لە دەنگدەرانی کوردستان کرد وەفادارانە بۆ پاراستنی دەستکەوتەکانی گەلی کوردستان و قەوارەی هەرێمی کوردستان دەنگ بدەن بە پارتی دیموکراتی کوردستان.

لەلایەکی دیکەوە: نێچیرڤان بارزانی ئاماژەی بە فشار و قەیرانەکانی ڕابردوو کرد و گوتی: "سەرەڕای ئەو هەموو قەیرانانەی لە پێنج ساڵی ڕابردوودا بەرۆکی هەرێمی کوردستانیان گرت، بەڵام بەراورد بەم پێنج ساڵە خزمەتێکی زۆر بە هەولێر و زاخۆ و شوێنەکانی دیکە کراوە، ئەمەش منەت نییە و خەڵکی کوردستان شایستەی خزمەتی زیاترە".