مەسرور بارزانی: حوکمڕانی بە كەسی فاشیل ناكرێت

ئاڤا نیوز

 

مەسرور بارزانی، جێگری سەرۆكی پارتی، لەمیانەی وتارێكیدا لە كەرنەڤاڵی بانگەشەی پارتی لە زاخۆ باسی لە دروشمی لایەنە سیاسییەكانی هەرێمی كوردستان بۆ بانگەشەی هەڵبژاردن كرد و ڕایگەیاند، دروشمەكان ڕووی ڕاستەقینەی هەمووانی دەرخست.

 

وێنە گەورەكە: لەچوارچێوەی بانگەشەی هەڵبژاردن، ئەمڕۆ پارتی بە ئامادەبوونی مەسرور بارزانی، جێگری سەرۆكی حیزبەكە، كەرنەڤاڵێكی جەماوەریی بە ئامادەبوونی دەیان هەزار كەس لە شاری زاخۆ ساز كرد.

 

لێدوانی فەرمی: مەسرور بارزانی، جێگری سەرۆكی پارتی دیموكراتی كوردستان ڕایگەیاند: هیچ كام لە دروشمی لایەنەكان باسی ئاوەدانی و پێشكەوتن ناكەن، دروشمی ئەوان دەڵێن كۆتایی پێدەهێنین، ڕایدەگرین، دەیانەوێ نائومێدی لەنێو خەڵك بڵاوبكەنەوە و وەڵامی ئێمەش بۆ ئەوان ئەوەیە "ناتوانن" دەنگی ئێوە پلانی ئەوان دەشكێنێ، دروشمی لایەنەكان ڕووی ڕاستەقینەی ئەوانی بۆ خەڵك دەرخست.

لەلایەكی دیكەوە: مەسرور بارزانی ڕاشیگەیاند: ئەگەر پارتی نەبووایە ئەو دۆخەی ئێستا هەیە دروست نەدەبوو، ئەگەر پارتی نەبووایە دیموكراسی لەم وڵاتە نەدەبوو، ئەو كەسەی هیچ دەستكەوت و بەرهەمێكی نەبێت، ئەو كەسەی فاشیل بێت، ئەو كەسەی لە بەڕێوەبردنی بەشێك لەم وڵاتە سەركەوتوو نەبووبێت، كەسی فاشیل حكومڕانی پێناكرێت.

ئەوەش بزانە: جێگری سەرۆكی پارتی دەشڵێ: ئەو لایەنەی وەفای نەبووە بۆ تێكۆشەرەكانی خۆی و بۆ قارەمانەكانی گەلی ئێمە، ئەمڕۆ چۆن وەفای بۆ خەڵك دەبێت كەسێك وەفای بۆ برا و هاوڕێ و تەنانەت ئەو كەسەش نەبێت كە هێناویەتییە سەر دەسەڵات، ئیتر چۆن وەفای بۆ خەڵك دەبێت، ئەو كەسەی دوێنێ خاكی كوردستانی فرۆشت ئەمڕۆ ئەم خاكەی پێناپارێزرێت.