سوێد گومانی لە مەرگی ناڤالنی هەیە و باڵیۆزی ڕووسیا بانگهێشت دەکات

ئاڤا نیوز

 

دوای گیان لەدەستدانی ئەلێکسی ناڤالنی لە زیندان، بەشێک لە وڵاتانی جیهان سەرکۆنەی مردنەکەیان کرد و گومانیان هەیە؛ داوای سەپاندنی سزای نوێ بەسەر ڕووسیا دەکەن.

 

چی ڕوویدا: ناڤالنی، ڕەخنەگرێكی دیاری سیاسەتەكانی كريملین بوو. ئەو بە 19 ساڵ بەندكردن سزادرا بوو و لە بەندیخانەیەكی جەمسەری باكوور بەند كرابوو. بەرپرسانی بەندیخانەكانی رووسیا مردنی لەناكاوی ناڤالنيیان ڕاگەیاند. ئەمەش گومان و ناڕەزایی زۆری لە ناوخۆ و لە دەرەوەی ڕووسیا لێكەوتەوە.

 

ڕاگەیێنراوی فەرمی: "پەیوەست بە مەرگی ئەلێکسی ناڤالنییەوە، باڵیۆزی ڕووسیا بانگهێشت کراوە و دەبێت یەکێتیی ئەوروپا لە دژی سەرکوتکردنە سیاسییەکانی نێو ڕووسیا کرداری هەبێت". وەزارەتی دەرەوەی سوێد ڕایگەیاندووە. 

 

زانیاریی زیاتر: جگە لە سوێد، ئەڵمانیا و لیتوانیا نوێنەرانی ڕووسیایان بۆ هەمان مەبەست بانگهێشت کردووە؛ داوا لە یەکێتیی ئەوروپا دەکرێت دژی سەرکوتکردنی ناوخۆی ڕووسیا بیر لە سەپاندنی سزای نوێ بکاتەوە.

 

باکگراوند: ئەلێكسی ناڤالنی، سەرسەخترین ڕەخنەگری سیاسەتەكانی پووتین بوو، بەتایبەتی لەسەر جەنگی ئۆكراینا. چەند میدیایەكی ڕۆژئاوا هەر دوای مردنی، ڕاستەوخۆ گومانیان دروستكرد و پێیانوایە لەلایەن پووتینەوە كوژرابێت.