مەسرور بارزانی: حكومڕانیی تەندروست واتا باشتركردنی ژیانی هاووڵاتیان

ئاڤا نیوز

 

سەرۆكوەزیران مەسرور بارزانی پاڵپشتیی حكومەت بۆ گەنجانی كوردستان دووپات دەكاتەوە و دەڵێ حكومڕانیی تەندروست واتا خزمەتكردنی زیاتری هاووڵاتیان و باشتركردنی ژیانیان.

 

وێنە گەورەکە: ئەمڕۆ سێشەممە قۆناغی دووەمی پرۆژەی گەشانەوە بە ئامادەبوونی سەرۆکوەزیران مەسرور بارزانی لە شاری هەولێر بۆ پاڵپشتی لە خاوەن بزنسە بچووک و مامناوەندەکان ڕاگەیێنرا. 

لێدوانی فەرمی: سەرۆكوەزیران مەسرور بارزانی، لە مەراسیمەکەدا ڕایگەیاند: كوردستان ماڵێكی فراوان و بەسوود و بەرهەمدارە، ئەوەی حەز بە كارکردن بكات، حكومەت ئامادەیە هەلی كاری یەکسان بۆ هەمووان بڕەخسێنێت.

 

لەلایەكی دیكەوە: سەرۆكوەزیران مەسرور بارزانی ڕاشیگەیاند: حكومڕانیی تەندروست واتا خزمەتكردنی زیاتری هاووڵاتیان و باشتركردنی ژیانیان و  پشتیوانیكردن لەو كەسانەی كە دەیانەوێت خاوەن كاری خۆیان بن یان پەرە بە بزنسی خۆیان بدەن.

 

زانیاریی زیاتر: پرۆژەی گەشانەوە، یەكێكە لە پرۆژەكانی كابینەی نۆیەمی حكومەت و تاوەكو ئێستا بەشی یەكەمی تاقیكراوەتەوە و سەركەوتوو بووە، ئەمە بۆ پاڵپشتیی داراییە وەك پایەیەكی سەرەكی بۆ گەشەی ئابووریی كەرتی تایبەت، بانكی تایبەت بەشدارە بۆ ئەوەی قەرز بداتە هاووڵاتی و خاوەنكاری بچووك و مامناوەند تاوەكو بتوانن گەشە بە پڕۆژەكانیان بدەن و حكومەت گەرەنتی ئەو پەیوەندییە بكات.

 

ئەوەی پێویستە بیزانیت: تاوەكو ئێستا زیاتر لە سێ ملیار دینار بە خاوەنكارەكان دراوە و لەڕێگەی پرۆژەكەوە بەرهەمەكانیان نزیكەی دووهێندە زیاد بووە، لە قۆناغی دووەم زیاتر لە 100 بزنسی دیكە بەشدار دەبن.