فازڵ میرانی: سیاسەت جووتەهاویشتن و خۆسووکردن نییە

ئاڤا نیوز

 

فازڵ میرانی، بەرپرسی دەستەی كارگێڕیی مەكتەبی سیاسیی پارتی دیموكراتی كوردستان وەڵامی وتارەكانی بافڵ تاڵەبانی، سەرۆكی یەكێتیی نیشتمانیی كوردستانی لەچوارچێوەی بانگەشەی هەڵبژاردن دەداتەوە و ڕایدەگەیێنێت، "سیاسەت زانست و ئەخلاقە و جووتەهاویشتن و هاواركردن نییە."

 

لێدوانی فەرمی: فازڵ میرانی لە كۆبوونەوەیەكی جەماوەری لە شاری هەولێر ڕایگەیاند: "سیاسەت زانست و ئەخلاقە و جووتەهاوێشتن و قیژاندن و هاواركردن و خەڵك سووكردن و خۆسووككردن نییە، ئێمە ناچینە ئەو ئاستەی كە ئێستا هەموو لایەنە سیاسییەكان بەرامبەر بە ئێمە دەیكەن، وەڵامیان نادەینەوە، ئێمە بەپێی بەڵگەی مێژوویی و جوگرافیا لەوان زیاتر زاناتر و لێهاتووتر و بەجەرگترین."

 

لەلایەكی دیكەوە: "كوردایەتی و نیشتمانپەروەری لە بارزانیی نەمرەوە دەستی پێكرد، ئێمە لەكوێ بووین و ئەوان لەكوێ بوون، ئەوانەی ئێستا زماندرێژی لەسەر پارتی و ڕێبازی بارزانی دەكەن حەز دەكەم مێژوو بخوێننەوە و سەیری ئەلبوومی وێنەكانیان بكەن بزانن لەكوێ بوون؟" میرانی وادەڵێت.

 

زانیاریی زیاتر: بەرپرسی دەستەی كارگێڕیی مەكتەبی سیاسیی پارتی ڕاشیگەیاند: خەڵك قوربانیی لەپێناو نیشتمان داوە و ئێستا كاتی قەرەبووكردنەوەیانە، دەبێت قەرەبووكردنەوەكە بە دابینکردنی ئارامیی و ئاسایش و خۆشگوزەرانی بێت، لە ئارامییەوە بۆ قۆناغی باشتر هەنگاو دەنێین، ئێمە ناچینە گۆڕەپانێك كە هەڕەشە بێت بۆ ئارامیی و ئاسایشی وڵاتەكەمان.