نەتانیاهۆ: شوێنگرەوەکەی نەسروڵڵامان کوشت

ئاڤا نیوز

 

بنیامین نەتانیاهۆ، سەرۆکوەزیرانی ئیسرائیل کوژرانی هاشم سەفییەدین شوێنگرەوەکەی حەسەن نەسروڵڵای پشتڕاست کردەوە

 

بۆچی گرنگە: دوای کوژرانی حەسەن نەسروڵڵا، ئەمینداری گشتیی حیزبوڵڵا لە ڕۆژی 27 ـی مانگی نۆ لە بۆردوومانێکی سوپای ئیسرائیل بۆ سەر بینایەک لە بەیرووتی پایتەختی لوبنان، قسەی زۆر لەسەر شوێنگرەوەکەی حەسەن نەسروڵڵا دەکرا و دەگوترا هاشم سەفییەدین کە یەکێکە لە سەرکردە باڵاکانی ئەو حیزبە، شوێنی دەگرێتەوە.

 

لێدوانی فەرمی: بنیامین نەتانیاهۆ، سەرۆکوەزیرانی ئیسرائیل لە پەیامێی ڤیدیۆییدا ڕایگەیاند، توانا سەربازییەکانی حیزبوڵڵامان تێکشکاندووە، ئێمە هەزاران تیرۆرستمان لەناوبردووە، لەناویاندا، حەسەن نەسروڵڵا، ئەمینداری حیزبوڵڵا و  هاشم سەفییەدین شوێنگرەوەکەی  نەسروڵڵا و هەروەها شوێنگرەوەکەی هاشم سەفییەدینیش کوژراوە. 

 

بۆچوونی بەرامبەر: تائێستا  حیزبوڵڵا هیچ لێدوانێكی لەبارەی کوژرانی هاشم سەفییەدینەوە نەداوە.

 

ئەمەش بزانە: لەدوای کورژانی نەسروڵڵاوە، سەفییەدین لەگەڵ  نایم قاسم، جێگری ئەمینداری گشتیی حیزبوڵڵا کاروبارەکانی حیزبوڵڵایان بەڕێوەبردووە. 

 

لەلایەکی دیکەوە: سەرۆکوەزیرانی ئیسرائیل پەیامە ڤیدیۆییەکەی  بە زمانی ئینگلیزی بڵاوکردەوە و لە بەشێکی قسەکانیدا داوا لە خەڵکی لوبنان دەکات وڵاتەکەیان لەژێر کۆنترۆڵی حیزبوڵڵا دەربهێنن.