سەرۆکوەزیران بارزانی پرۆژەیەکی گەشتیاری لە چیای کۆڕەک دەکاتەوە

ئاڤا نیوز 

 

سەرۆکوەزیران مەسرور بارزانی لە چوارچێوەی سەردانەکەی بۆ ئیدارەی سەربەخۆی سۆران، پڕۆژەیەکی گەشتیاری لە چیای کۆڕەک دەکاتەوە کە پرۆژەکە هۆتێلێکی پێنج ئەستێرە لەخۆدەگرێت و یەکەمین هۆتێلی پێنج ئەستێرەیە لەسەر ئاستی عێراق  لەسەر چیا بوونیادنرابێت.

 

وێنە گەورەکە: ئیدارەی سەربەخۆی سۆران دەوڵەمەندە بە ژمارەیەکی زۆر ناوچەی گەشتیاری، 35%ـی ناوچە گەشتیارییەكانی هەرێمی كوردستان پێكدەهێنن، ساڵانە ملیۆنان گەشتیار لە باوەش دەگرێت، ئەمڕۆش پڕۆژەیەکی دیکەی گرنگ بۆ حەوانەوەی گەشتیاران دەکرێتەوە.

 

زانیاریی بەدەستهاتوو: هۆتێلی ڕادی سۆنبلو، یەکەمین هۆتێلی پێنج ئەستێرەیە لەسەر ئاستی عێراق کە لەسەر چیا بێت و لە 81 ژوور پێکدێت، بە ستانداردێکی جیهانی دروستکراوە، سێ مەلەوانگە لەخۆ دەگرێت کە دووانیان لە ناوەوە و یەکێکیان لەدەرەوەیە، بازاڕ، هۆڵی لەشجوانی بۆ پیاوان و  ئافرەتان، هۆڵی ئاهەنگ، هۆڵی کۆبوونەوە، هێڵپ سەنتەر و هۆڵی گەیمینگ لەخۆدەگرێت.

 

ئەوەی پێوستە بیزانیت: ساڵی ڕابردوو یەک ملیۆن و نیو گەشتیار سەردانی ناوچە گەشتیارییەکانی ئیدارەی سەربەخۆی سۆرانیان کردووە، لە ماوەی پێنج ساڵی ڕابردوو ڕێژەی مانەوەی گەشتیاران لە ناوچەکە بەهۆی زۆری شوێنی حەوانەوە زیادی کردووە.