سەرۆکوەزیران بارزانی:  هیوادارم چیتر لە جێبەجێکردنی پرۆژە بەربەست بۆ حکومەت دروست نەکرێت

ئاڤا نیوز

سەرۆكوەزیران مەسرور بارزانی، لە چوارچێوەی ڕێوڕەسمی دانانی بەردی بناغەی جووتسایدی هەولێر - كۆیە ڕایگەیاند، ڕێگر و بەربەست هەبوون لەبەردەم گەیشتنی دەستی ئاوەدانی و خۆشگوزەرانی بۆ سەرجەم شار و شارۆچكەكان.

وێنە گەورەكە: ئەمڕۆ پێنجشەممە لە ڕێوڕەسمێكدا بەردی بناغەی پڕۆژەی جووتسایدی هەولێر - كۆیە لەلایەن سەرۆكوەزیران مەسرور بارزانییەوە دانرا. ماوەی تەواوبوونی پڕۆژەكە سێ ساڵە و دوای تەواوبوونی ماوەی نێوان دوو شارەكە لە کاتژمێرێکەوە بۆ نیو کاتژمێر کەمدەبێتەوە.

لێدوانی فەرمی: سەرۆكوەزیران مەسرور بارزانی ڕایگەیاند: دوو هەفتە پێش ئێستا لە قوتابخانەیەكی كۆیە بەڵێنی جێبەجێكردنی ئەم پڕۆژەیەمان دا، خۆشبەختانە ئەمڕۆ بەردی بناغەكەی دادەنێین، ئەم ڕێگایە یارمەتیدەرێكی زۆر دەبێت لە بەستنەوەی كۆیە و تەقتەق بە هەولێری پایتەخت، هاوكات دەبێتە بەشێكی سەرەكی لە ڕێگای هەولێر - سلێمانی.

بە ئاماژەکردن بەوەی هەموو شار و شارۆچكەكان پێویستیان بە پڕۆژەی خزمەتگوزاریی زیاترە، جەختی لەوە کردەوە خەڵكی كۆیە شایەنی ئەوەن زیاتر خزمەت بكرێن. ڕاشیگەیاند کار لەسەر ئەوە دەکەن سەرجەم شارەکانی هەرێمی کوردستان بە یەکەوە ببەستنەوە 

لەلایەكی دیكەوە: سەرۆكوەزیران مەسرور بارزانی ئاماژەی بە ئەوە دا كە پێشووتر بەربەست و ڕێگر هەبوون لە  جێبەجێكردنی پڕۆژە خزمەتگوزارییەكان بۆ سەرجەم شار و شارۆچكەكانی هەرێمی كوردستان، هیواشی خواست چیدیكە ئەم بەربەستانە نەمێنن و ڕێگر نەبن لە گەیشتنی دەستی ئاوەدانی و خۆشگوزەرانی بۆ سەرجەم شار و شارۆچكەكان.


خاڵە ئەرێنییەکان: بەتەواوکردنی ئەو جووتسایدە شەش كیلۆمەتر ڕێگا كورت دەبێتەوە و لە 52 كیلۆمەترەوە دەبێتە 46 كیلۆمەتر. ماوەی ڕێگاکە نیو کاتژمێر کەم دەبێتەوە، ئەگەر ئۆتۆمبێلێک بەخێرایی 100 كیلۆمەتر لە كاتژمێرێک لە هەولێرەوە بۆ كۆیە بڕوات، بە ماوەی نزیکەی 30 خولەک دەگات.