وەزیری پەروەردە وادەی دابەشکردنی چوار مووچەی مامۆستایانی گرێبەست ئاشکرا دەکات

ئاڤا نیوز 

 

وەزیری پەروەردەی هەرێمی کوردستان ڕایدەگەیێنێت، لەسەرەتای هەفتەی داهاتووەوە شایستەی دارایی مانگی شەشی مامۆستایانی وانەبێژ دابەش دەکرێت و ئەو دەنگۆیانەی لەبارەی مامۆستایانی گرێبەست باس دەکرێت ڕاست نین.

 

وێنە گەورەکە: مانگی ئابی ئەمساڵ، بەبڕیاری سەرۆکوەزیران مەسرور بارزانی زیاتر لە 37 هەزار مامۆستای وانەبێژ کران بە گرێبەست.

 

لێدوانی فەرمی: ئالان حەمەسەعید، وەزیری پەروەردەی هەرێمی کوردستان، میوانی گەشتی هەواڵەکانی کاتژمێر حەوتی ئاڤا میدیابوو ڕایگەیاند: ئەمڕۆ پێنجشەممە، ئەنجومەنی وەزیران نووسراوی کردووە بۆ وەزارەتی دارایی و ئابووری، لە سەرەتای هەفتەی داهاتوودا، شایستەی مانگی شەشی وانەبێژان خەرج دەکرێت و لەگەڵ مووچەی مانگی نۆ لەگەڵ مووچەی وەزارەتی پەروەردە یەکەم مووچەی گرێبەستبوون وەردەگرن، وەزیری پەروەردە باسی لەوەشکرد، لە مانگی 11 دەست بە دابەشکردنی شایستەی دارایی مانگی حەوت و هەشتی وانەبێژان دەکرێت.

 

زانیاریی زیاتر: وەزیری پەروەردە دڵنیایی دەدات، بڕیاری بە گرێبەست بوونی مامۆستایانی وانەبێژ بۆ هەمیشەییە و ئەو دەنگۆیانە ڕاست نین کە دەڵێن، ئەم بڕیارە تەنیا بۆ سێ مانگە.