ئاهەنگی دەرچوون بۆ زیاتر لە پێنج هەزار قوتابی زانکۆی سەڵاحەددین دەکرێت

ئاڤا نیوز

 

زانکۆی سەڵاحەددین بە ئامادەبوونی سەرۆکی حکومەتی هەرێمی کوردستان ڕێوڕەسمی ئاهەنگی خولی 43ـیەمین بۆ زیاتر لە پێنج هەزار دەرچووی ئەنجام دەدات.

 

وێنە گەورەکە: لەوەتەی ساڵی 1981 زانکۆی سەڵاحەددین گواستراوەتەوە بۆ شاری هەولێر، ساڵانە ئاهەنگی خولی دەرچوون بۆ قوتابییان ئەنجام دەدات.

 

لێدوانی فەرمی: د.کامەران یونس، سەرۆکی زانکۆی سەڵاحەددین بە ئاڤا نیوزی ڕاگەیاند، بڕیارە ڕۆژی هەینی بە ئامادەبوونی سەرۆکوەزیران مەسرور بارزانی ئاهەنگی خولی 43ی دەرچوون لەژێر ناونیشانی " خولی زانست، داهێنان و بنیادنان" بۆ پێنج هەزار و 553 قوتابی ئەنجام بدرێت.

 

زانیاریی زیاتر: بەگوتەی سەرۆکی زانکۆی سەڵاحەددین، ئامادەکارییەکان تەواو کراون و سبەی هەینی کاتژمێر 6:00 لە یاریگای نێودەوڵەتی فەرەنسۆ هەریری لە شاری هەولێر ئاهەنگەکە دەستپێدەکات.

 

ئەوەی پێویستە بیزانیت: زانکۆی سەڵاحەددین لە ساڵی 1968 لە سلێمانی دامەزراوە، لە 16 کۆلیژ و 86 بەش پێکدێت، دوو هەزار و 622 مامۆستای بە پلەی جیاواز هەیە.