پەتاتەی هەرێمی كوردستان هەناردەی كیشوەری ئەفریقا دەكرێت

ئاڤا نیوز

 

بۆ یەکەمجار پەتاتەی هەرێمی کوردستان  ڕەوانەی کیشووەری ئەفریقا کرا و بڕیاریشە پرۆسەکە بەردەوام بێت.

 

بۆچی گرنگە: هەناردەكردنی بەرهەمی جووتیارانی ناوخۆ بۆ وڵاتان، جگە لەوەی ڕێگر دەبێت لە بەفیڕۆچوونی ئەو بەرهەمە كشتوكاڵییانەی كە لە پێداویستیی ناوخۆ زیاترن، هاوكات لەڕووی ئابوورییەوە گرنگیی خۆی هەیە و لەو ڕێگەیەوە بڕێكی زۆر پارە لە دەرەوە دێتە نێو هەرێمی كوردستان و دەكەوێتە دەست خاوەنكارەكان.

 

زانیاریی بەدەستهاتوو: شاری هەولێر خاوەنی زۆرترین ڕێژەی بەرهەمی پەتاتەیە و ئەمساڵ 600 تۆن پەتاتە تەنیا لە سنووری شاری هەولێر بەرهەم هاتووە، دوا هەناردەكردن بۆ ژمارەیەك وڵاتی دراوسێی عێراق، بۆیەكەمجاریش پەتاتەی هەرێمی كوردستان هەناردەی كیشوەری ئەفریقا کرا.

لێدوانی فەرمی: هیوا عەلی، گوتەبێژی وەزارەتی کشتوکاڵ بە ئاڤا نیوزی گوت: کاری زۆر کراوە بۆ پێشخستنی سێکتەری بەرهەمهێنانی پەتاتە، لە 15 بۆ 20 ساڵی ڕابردوو پێداویستی تەواوی ناوخۆمان نەبوو، بەڵام ئێستا ڕێژەی بەرهەم بە شێوەیەکی بەرچاو بەرزبووەتەوە.

 

لەلایەكی دیكەوە: بەپێی گرێبەستی نێوان كۆمپانیایەكی هەرێمی كوردستان و كۆمپانیایەكی لیبیریا وەك هەنگاوی یەكەم 100 تۆن پەتاتە هەناردەی لیبیریا دەكرێت و ڕۆژی 10-10-2024 هەناردەكردنەكە دەستی پێكرد.

ئەمەش بزانە: پێش ئەم کابینەیە بەرهەمهێنای پەتاتە 25 هەزار تۆن بوو، ئێستا گەیشتووەتە 800 هەزار تۆن.

ژمارەکان وا دەڵێن: لە ساڵی 2023ـدا 86 هەزار و 453 دۆنم زەوی بە پەتاتە داچێنراون و 800 هەزار تۆن بەرهەمی هەبووە، لە کابینەی نۆیەمدا هەشت هەزار تۆن هەناردەی ئیمارات و سعودیە کراوە، چەند وڵاتێکی دیکەش لەنێویانیشدا لیبیریا داوای پەتاتەی کوردستانیان کردووە.