ساسان عەونی: بەشێك لە وەزارەتەكان هێشتا ناوی فەرمانبەرانیان بۆ دابەشكردنی زەوی نەناردووە

ئاڤا نیوز

 

كار و ئامادەكارییەكانی پرۆسەی دابەشكردنی زەوی خێراتر دەكرێت و زاخۆ یەكەم شارە پڕۆسەی دابەشكردنەكەی لێ جێبەجێ دەكرێت.

 

وێنە گەورەكە: بەفەرمانی سەرۆكوەزیران مەسرور بارزانی، زەوی بەسەر سەرجەم ئەو فەرمانبەرانە دابەش دەكرێت كە تاوەكو ئێستا سوودمەند نەبوون و وەزارەتی شارەوانی و گەشتوگوزاری حكومەتی هەرێمی كوردستانیش سەرقاڵی ئامادەكارییەكانن بۆ دەستپێكردن بە پرۆسەكە.

 

لێدوانی فەرمی: ساسان عەونی، وەزیری شارەوانی و گەشتوگوزار بە ئاڤا نیوزی ڕاگەیاند: بەهۆی ئەوەی ئیدارەی سەربەخۆی زاخۆ زەوییەكانی ئامادەیە و داتا و زانیاریی پێویستیان سەبارەت بە فەرمانبەرانی سنوورەكە ناردووە بەزووترین كات پرۆسەی دابەشكردنی زەوی لە زاخۆ دەستپێدەكات و دواتریش هەولێر و دهۆك و شارەكانی دیكە.

 

لەلایەكی دیكەوە: "تاوەكو ئێستا بەشێك لە وەزارەتەكان داتا و ناو و زانیارییەكانیان نەناردووە یاخود ناردوویانە و كەموكوڕی تێدایە، ئێستا لیژنەیەكی باڵا سەرپەرشتی چارەسەركردنی بابەتەكە دەكات". وەزیری شارەوانی و گەشتوگوزار وادەڵێت.

 

ئەمەش بزانە: ژمارەیەك سەندیكا لە نموونەی سەندیكاكانی ڕۆژنامەنووسان و پارێزەران داوایان پێشكەش بە وەزارەتی شارەوانی كردووە بۆ ئەوەی دابەشكردنی زەوی ئەندامانی ئەو سەندیكایانەش بگرێتەوە كە دامەزراوی حكومەت نین. وەزیری شارەوانی دەڵێت، لە قۆناغی دواتر بەدواداچوون بۆ ئەو داواكارییانەش دەكەن.